اسلام آباد: ایشین کرکٹ کونسل (اے سی سی) کے صدر محسن نقوی نے بھارتی کرکٹ بورڈ (بی سی سی آئی) کے خط کا جواب دیتے ہوئے واضح کردیا ہے کہ اگر بھارتی ٹیم کو ایشیا کپ 2025 کی ٹرافی چاہیے تو اس کے لیے باقاعدہ تقریب منعقد کی جائے گی جس میں آکر ٹرافی وصول کر لی جائے۔
ذرائع کے مطابق بی سی سی آئی نے اے سی سی کو خط لکھ کر ایشیا کپ 2025 کی ٹرافی وصول کرنے کی درخواست کی تھی، جس پر محسن نقوی نے دوٹوک مؤقف اپناتے ہوئے کہا کہ “ٹرافی کوئی ڈاک سے بھیجنے والی چیز نہیں، اگر واقعی ٹرافی چاہیے تو آئیں، ہم تقریب رکھ دیتے ہیں۔”
اے سی سی ذرائع کے مطابق محسن نقوی نے بھارتی بورڈ کو آگاہ کردیا ہے کہ ٹرافی دینے کی تقریب 10 نومبر کو منعقد کرنے کی تجویز دی گئی ہے۔ اس حوالے سے بی سی سی آئی کو باضابطہ اطلاع بھی دے دی گئی ہے کہ ان کے عہدیدار کسی ایک کھلاڑی کے ہمراہ آکر تقریب میں ٹرافی وصول کرسکتے ہیں۔
ذرائع کا کہنا ہے کہ محسن نقوی نے مؤقف اختیار کیا کہ کھیلوں میں عزت و احترام برقرار رکھنا سب کے لیے یکساں ضروری ہے، اور ایشین کرکٹ کونسل اپنے اصولوں پر کوئی سمجھوتہ نہیں کرے گی۔
واضح رہے کہ ایشیا کپ 2025 کے فائنل میں بھارت نے کامیابی حاصل کی تھی، تاہم بھارتی ٹیم نے فائنل کے بعد اے سی سی صدر محسن نقوی سے ٹرافی وصول کرنے سے انکار کر دیا تھا۔ اس رویے پر محسن نقوی نے اصل ٹرافی واپس اے سی سی دفتر بھجوا دی تھی اور کہا تھا کہ اگر بھارتی کپتان کو ٹرافی چاہیے تو “وہ میرے دفتر آکر لے جائے۔”
بعد ازاں بھارتی کھلاڑیوں نے اصل ٹرافی کے بجائے فرضی تصویر سوشل میڈیا پر شیئر کرکے اپنی کامیابی کا جشن منایا، جس پر دنیا بھر کے کرکٹ شائقین نے حیرت اور تنقید کا اظہار کیا تھا۔ اب محسن نقوی کے تازہ جواب کے بعد بھارتی بورڈ پر واضح کردیا گیا ہے کہ ایشیا کپ کی ٹرافی صرف باقاعدہ تقریب میں ہی دی جائے گی۔
