چوتھے دن کے کھیل کا آغاز ہوتے ہی پاکستانی بلے باز مشکلات کا شکار نظر آئے۔ قومی ٹیم اپنی دوسری اننگز میں زیادہ دیر وکٹ پر نہ ٹھہر سکی اور ایک کے بعد ایک کھلاڑی پویلین لوٹ گیا۔ ابتدا میں بابراعظم 50 رنز بنا کر آؤٹ ہوئے، جس کے بعد مڈل آرڈر مکمل طور پر ناکام ہوگیا۔ محمد رضوان نے 18، سلمان علی آغا نے 28 اور ساجد خان نے 13 رنز بنائے، جب کہ نعمان علی اور شاہین آفریدی بغیر کوئی رن بنائے آؤٹ ہوئے۔ آصف آفریدی صفر رنز کے ساتھ ناٹ آؤٹ رہے۔
پاکستانی ٹیم 68 رنز کی برتری کے ساتھ آل آؤٹ ہوئی، یوں جنوبی افریقا کو جیت کے لیے 68 رنز کا آسان ہدف ملا۔
مہمان ٹیم نے دوسری اننگز میں یہ ہدف صرف دو وکٹوں کے نقصان پر حاصل کرلیا۔ ایڈم مرکرم نے 42 رنز کی اننگز کھیلی جب کہ ریان ریکلٹن 25 رنز بناکر ناٹ آؤٹ رہے۔ ٹرسٹن اسٹبز بغیر کوئی رن بنائے آؤٹ ہوئے۔
جنوبی افریقا کی جانب سے اسپنرز نے شاندار کارکردگی دکھائی۔ سیمن ہارمر نے 6 وکٹیں حاصل کیں، کیشو مہاراج نے 2 اور کگیسو ربادا نے ایک کھلاڑی کو آؤٹ کیا۔
میچ کے اختتام پر کیشو مہاراج کو ان کی نپی تلی باؤلنگ پر “مین آف دی میچ” قرار دیا گیا، جب کہ آل راؤنڈر موتو سامی کو “پلئیر آف دی سیریز” کا ایوارڈ ملا۔
یاد رہے کہ پہلی اننگز میں پاکستان نے 333 رنز بنائے تھے جس کے جواب میں جنوبی افریقا نے 404 رنز کا مجموعہ حاصل کیا تھا۔ اس طرح راولپنڈی ٹیسٹ میں جنوبی افریقا نے پہلی اننگز میں برتری حاصل کرنے کے بعد میچ پر مکمل کنٹرول قائم رکھا اور چوتھے دن کے آغاز پر ہی فتح اپنے نام کرلی۔
