کراچی: معروف اداکارہ صبا قمر نے انکشاف کیا ہے کہ جیو ٹی وی اور سیونتھ اسکائی انٹرٹینمنٹ کے طاقتور ڈرامے ’’کیس نمبر 9‘‘ کی شوٹنگ کے دوران انہیں شدید ذہنی اور جسمانی دباؤ کا سامنا کرنا پڑا، جس کے باعث ان کی صحت متاثر ہوئی۔
ڈرامہ کیس نمبر 9 کی تحریر معروف صحافی شاہ زیب خانزادہ نے کی ہے، جبکہ پروڈکشن کے فرائض عبداللہ کادوانی اور اسد قریشی نے انجام دیے ہیں۔ ہدایت کار سید وجاہت حسین ہیں جو حقیقت سے قریب کہانیاں اور جذباتی مناظر دکھانے کے ماہر مانے جاتے ہیں۔ یہ ڈرامہ اس وقت اپنے منفرد موضوع، دل کو چھو لینے والی کہانی اور باکمال اداکاری کے باعث ناظرین کی توجہ کا مرکز بن چکا ہے۔
اداکارہ صبا قمر نے اپنی انسٹاگرام اسٹوریز میں بتایا کہ ڈرامے میں مسلسل جذباتی مناظر کی شوٹنگ نے ان کے ذہن اور جسم دونوں پر اثر ڈالا۔ ان کا کہنا تھا کہ ایسے مناظر بار بار شوٹ کروانا انسان کو اندر سے ہلا دیتا ہے، اور مجھے اسی وجہ سے صحت کے مسائل کا سامنا کرنا پڑا۔ انہوں نے مزید کہا کہ وہ اپنی بہتر دیکھ بھال کر رہی ہیں اور خود کو یاد دلاتی ہیں کہ وہ مضبوط ہیں۔ صبا قمر نے کہا کہ اگرچہ یہ عمل مشکل ہے مگر انہیں اپنا کام بے حد پسند ہے، یہی جذبہ انہیں حوصلہ اور طاقت دیتا ہے۔
ٹی وی شو میں شریک سینئر اداکاروں شمعون عباسی، نادیہ خان اور عتیقہ اوڈھو نے بھی صبا قمر کی جاندار اداکاری کی تعریف کی۔ شمعون عباسی نے کہا کہ صبا ایک انتہائی باصلاحیت اور پروفیشنل اداکارہ ہیں جو کردار میں مکمل طور پر ڈوب جاتی ہیں، جبکہ عتیقہ اوڈھو نے ان کی قدرتی اداکاری کو سراہتے ہوئے کہا کہ صبا نے کردار کو حقیقت کے قریب لا کر دکھایا۔
ڈرامے کی کہانی ایک ایسی لڑکی سحر کے گرد گھومتی ہے جو ظلم، طاقت اور انا کے نظام کے سامنے جھکنے سے انکار کرتی ہے۔ یہ کردار صبا قمر نے انتہائی خوبصورتی سے نبھایا ہے۔ دوسری جانب فیصل قریشی نے کامران کا کردار ادا کیا ہے، جو ایک انا پرست اور طاقتور بزنس مین ہے اور سحر کو اپنی مرضی کے تابع کرنے کی کوشش کرتا ہے۔ ڈرامے کی کہانی انصاف، حوصلے، عورت کے وقار اور سماجی سچائیوں کو نہایت جرات مندانہ انداز میں پیش کرتی ہے۔
کیس نمبر 9 کی کاسٹ میں جنید خان، آمنہ شیخ، رشنا خان، گوہر رشید، حنا بیات، علی رحمان خان، نوین وقار، زہرہ امیر، مزنا وقاص، فائزہ گیلانی، کامران جیلانی، عذرا محی الدین سمیت دیگر معروف فنکار شامل ہیں۔ یہ تمام اداکار اپنی اپنی جگہ کرداروں میں جان ڈالنے میں کامیاب رہے ہیں، جس سے ڈرامہ ایک مکمل شاہکار بن چکا ہے۔
ناظرین اور ناقدین کے مطابق یہ ڈرامہ پاکستانی ڈرامہ انڈسٹری کے لیے ایک نمایاں سنگ میل ثابت ہو رہا ہے۔ سوشل میڈیا پر صبا قمر کی اداکاری کو ان کے کیریئر کی بہترین پرفارمنس قرار دیا جا رہا ہے۔ ناقدین کا کہنا ہے کہ کیس نمبر 9 نہ صرف ایک کہانی ہے بلکہ معاشرے میں عورت کے ساتھ ہونے والے ناانصافیوں پر سوچنے پر مجبور کرنے والا پیغام بھی ہے۔
