لاہور: وزیراعلیٰ پنجاب مریم نواز شریف نے ایئر پنجاب منصوبے کو جلد از جلد فعال کرنے کا حکم دیتے ہوئے کہا ہے کہ صوبے کی فضائی سفری سہولیات کو عالمی معیار کے مطابق بنایا جائے تاکہ عوام کو آرام دہ، محفوظ اور جدید سفری خدمات میسر ہوں۔
وزیراعلیٰ مریم نواز شریف کی زیر صدارت ہونے والے اعلیٰ سطح اجلاس میں ایئر پنجاب پراجیکٹ پر پیش رفت کا تفصیلی جائزہ لیا گیا۔ اجلاس کے دوران وزیراعلیٰ کو بریفنگ دی گئی کہ منصوبے کے فیز ون کے تحت ابتدائی فلائٹس کا آغاز لاہور سے اسلام آباد کے روٹ پر کیا جائے گا، جس پر اتفاق بھی کر لیا گیا۔
وزیراعلیٰ نے متعلقہ حکام کو ہدایت کی کہ ایئر پنجاب کے فیز ون کے لیے تمام انتظامی اور تکنیکی کارروائیاں جلد مکمل کی جائیں تاکہ منصوبہ جلد از جلد آپریشنل ہو سکے۔ انہوں نے کہا کہ اس ایئر لائن کے لیے جدید، ایندھن کی بچت کرنے والے اور مسافروں کے لیے آرام دہ طیارے لیز پر حاصل کیے جائیں، تاکہ مسافروں کو اعلیٰ معیار کی سفری سہولت فراہم کی جا سکے۔
اجلاس میں مری گلاس ٹرین پراجیکٹ پر بھی تفصیلی غور کیا گیا۔ وزیراعلیٰ مریم نواز شریف نے اس منصوبے کے ممکنہ اقدامات کی نشاندہی اور عملی پیش رفت کے لیے فوری سفارشات تیار کرنے کی ہدایت دی۔ انہوں نے کہا کہ پنجاب حکومت سیاحت کے فروغ، سفری سہولتوں کی بہتری اور جدید ٹرانسپورٹ کے نظام کے قیام پر خصوصی توجہ دے رہی ہے تاکہ صوبے کی معیشت کو تقویت اور عوام کو سہولت میسر ہو۔
