راولپنڈی: ڈائریکٹر جنرل آئی ایس پی آر لیفٹیننٹ جنرل احمد شریف چودھری نے کہا ہے کہ پاکستان نے دہشت گردی اور خوارج کے خلاف بھرپور اور مؤثر اقدامات کیے ہیں، پاک فوج اور عوام دشمن کی کسی بھی جارحیت کے سامنے سیسہ پلائی ہوئی دیوار ثابت ہوں گے۔
مردان کی مختلف جامعات اور مدارس کے اساتذہ و طلبہ کے ساتھ خصوصی نشست میں اظہارِ خیال کرتے ہوئے ڈی جی آئی ایس پی آر نے کہا کہ پاکستان نے گزشتہ دو دہائیوں میں دہشت گردی کے خلاف عظیم قربانیاں دی ہیں، دہشت گردی کے خاتمے کے لیے جاری جدوجہد میں قوم اور مسلح افواج ایک دوسرے کے ساتھ ہیں۔
اجلاس میں عبد الولی خان یونیورسٹی، وومن یونیورسٹی، یونیورسٹی آف انجینئرنگ اینڈ ٹیکنالوجی اور مختلف مدارس کے طلبہ و اساتذہ شریک ہوئے۔ اس موقع پر معرکہ حق، حالیہ پاک افغان کشیدگی اور موجودہ سکیورٹی صورتحال پر تفصیلی بات چیت کی گئی۔
لیفٹیننٹ جنرل احمد شریف چودھری نے کہا کہ دشمن ملک کے اندر خوف اور انتشار پھیلانے کی ناکام کوشش کر رہا ہے، مگر پاکستانی عوام اور فورسز متحد ہیں۔ انہوں نے نوجوانوں پر زور دیا کہ وہ سوشل میڈیا پر ملک دشمن پروپیگنڈا کے خلاف مثبت کردار ادا کریں اور پاکستان کے بیانیے کو مضبوط بنائیں۔
نشست کے دوران اساتذہ اور طلبہ نے شہداء اور غازیانِ وطن کو خراج تحسین پیش کرتے ہوئے کہا کہ ڈی جی آئی ایس پی آر کی گفتگو سے مسلح افواج کے کردار سے متعلق کئی ابہام دور ہو گئے ہیں۔
اساتذہ نے کہا کہ قوم، امن کے قیام اور ملکی استحکام میں پاک فوج کے کردار کو قدر کی نگاہ سے دیکھتی ہے۔ طلبہ نے اپنے عزم کا اظہار کرتے ہوئے کہا کہ خیبرپختونخوا کے نوجوان ملک کے دفاع اور سلامتی کے لیے پاک فوج کے شانہ بشانہ کھڑے ہیں۔ انہوں نے اس عزم کا بھی اظہار کیا کہ سوشل میڈیا پر ملک دشمن بیانیے کا مؤثر جواب دیا جائے گا تاکہ پاکستان کے خلاف جاری نفرت انگیز مہمات کا خاتمہ کیا جا سکے۔
