بھارتی ون ڈے ٹیم کے نائب کپتان شریاس ایئر کی حالت تشویشناک بتائی جا رہی ہے، انہیں پسلیوں میں شدید چوٹ لگنے کے بعد آئی سی یو میں منتقل کردیا گیا ہے۔
بھارتی میڈیا کے مطابق شریاس ایئر آسٹریلیا کے خلاف تیسرے ون ڈے میچ کے دوران فیلڈنگ کرتے ہوئے زخمی ہوگئے تھے۔ میچ میں ایک مشکل کیچ پکڑنے کی کوشش کے دوران وہ زمین پر گر پڑے جس سے ان کی پسلیوں پر گہری چوٹ آئی۔
ابتدائی طور پر معمولی سمجھا جانے والا زخم اب خطرناک نوعیت اختیار کرچکا ہے۔ رپورٹ کے مطابق شریاس ایئر کی اندرونی بلیڈنگ شروع ہوگئی جس کے باعث انہیں فوری طور پر اسپتال منتقل کیا گیا۔ طبی ماہرین نے احتیاطی تدابیر کے طور پر انہیں انتہائی نگہداشت وارڈ یعنی آئی سی یو میں داخل کردیا ہے۔
بھارتی میڈیا کے مطابق شریاس ایئر ہفتے کے روز سے سڈنی کے ایک اسپتال کے آئی سی یو میں زیر علاج ہیں جہاں وہ دو سے سات دن تک ڈاکٹرز کی نگرانی میں رہیں گے۔
ڈاکٹرز کا کہنا ہے کہ اندرونی بلیڈنگ کے باعث انفیکشن کا خدشہ بڑھ گیا ہے، اسی لیے کھلاڑی کو مسلسل مانیٹرنگ میں رکھا گیا ہے۔ ان کے علاج کا عمل جاری ہے اور ابھی انہیں فضائی سفر کی اجازت نہیں دی گئی۔
ڈاکٹرز کی جانب سے حتمی طبی منظوری کے بعد ہی شریاس ایئر بھارت واپس جا سکیں گے۔
ٹیم ذرائع کے مطابق شریاس ایئر کی حالت اب بتدریج بہتر ہو رہی ہے تاہم مکمل صحت یابی کے لیے انہیں آرام کی سختی سے ہدایت کی گئی ہے۔
واضح رہے کہ شریاس ایئر بھارتی ون ڈے اسکواڈ کے اہم رکن ہیں اور گزشتہ مہینوں میں ان کی شاندار کارکردگی نے انہیں ٹیم کا مستقل حصہ بنا دیا تھا۔ بھارتی کرکٹ شائقین اور ٹیم کے دیگر کھلاڑیوں نے ان کی جلد صحت یابی کے لیے نیک خواہشات کا اظہار کیا ہے۔
