پاکستان شوبز انڈسٹری کی معروف اور باصلاحیت اداکارہ صبا قمر نے ایک چونکا دینے والا انکشاف کرتے ہوئے بتایا ہے کہ انہیں ذہنی دباؤ کے باعث دل کا معمولی دورہ پڑا، جس کے اگلے ہی روز ان کی انجیوگرافی کی گئی۔
اداکارہ نے حال ہی میں دیے گئے ایک تفصیلی انٹرویو میں اپنے کیریئر، ذاتی زندگی اور ذہنی صحت پر کھل کر بات کی۔ اس دوران صبا قمر نے کہا کہ ہم سب سمجھتے ہیں کہ ہم بہت مضبوط ہیں اور ہر قسم کے حالات کا سامنا کر سکتے ہیں، لیکن حقیقت میں یہی حالات ایک دن ہارٹ اٹیک، انزائٹی یا ڈپریشن کی شکل اختیار کر لیتے ہیں۔
صبا قمر نے بتایا کہ انہیں خود بھی حال ہی میں ایسی صورتحال کا سامنا کرنا پڑا۔ انہوں نے کہا کہ مجھے ذہنی دباؤ کی وجہ سے معمولی ہارٹ اٹیک ہوا، اگلے دن میری انجیوگرافی ہوئی، لیکن الحمداللہ اب میں بہتر محسوس کر رہی ہوں۔
اداکارہ کے مطابق ڈاکٹرز نے انہیں ہارٹ اٹیک کی 20 وجوہات بتائیں، جن میں صرف کولیسٹرول نہیں بلکہ تناؤ اور جذباتی دباؤ بھی شامل تھے۔ ان کا کہنا تھا کہ ہم ہمیشہ جسمانی بیماریوں پر توجہ دیتے ہیں مگر ذہنی صحت کو سنجیدہ نہیں لیتے، حالانکہ یہی سب سے زیادہ اہم ہے۔
انہوں نے عوام سے اپیل کی کہ وہ اپنی ذہنی صحت کو کبھی بھی نظرانداز نہ کریں اور اگر وہ دباؤ، انزائٹی یا افسردگی کا شکار ہوں تو فوری طور پر مدد حاصل کریں۔
یاد رہے کہ رواں برس یکم اگست کو صبا قمر کو دورانِ شوٹنگ اچانک طبیعت خراب ہونے پر اسپتال منتقل کیا گیا تھا، جہاں ڈاکٹروں نے انہیں مکمل آرام کا مشورہ دیا تھا۔ ان کے قریبی ذرائع کے مطابق اداکارہ نے اس دوران اپنے مداحوں سے دعاؤں کی درخواست بھی کی تھی اور کچھ ہفتے بعد صحتیابی کے بعد دوبارہ شوٹنگ سیٹ پر واپسی کی تھی۔
صبا قمر کا یہ انٹرویو نہ صرف ان کی ذاتی جدوجہد کا آئینہ دار ہے بلکہ یہ پاکستانی شوبز انڈسٹری اور عام لوگوں کے لیے ایک اہم پیغام بھی ہے کہ ذہنی دباؤ اور تناؤ کو معمولی نہ سمجھا جائے کیونکہ یہ جسمانی بیماریوں کی شکل بھی اختیار کر سکتا ہے۔
