پاکستان انٹرنیشنل ایئرلائنز (پی آئی اے) نے سعودی عرب کی نئی فضائی کمپنی ریاض ایئر کے ساتھ ایک اہم اور تاریخی کارگو معاہدہ کرلیا ہے، جسے پاکستان کی فضائی صنعت کے لیے ایک بڑی پیش رفت قرار دیا جا رہا ہے۔
ترجمان پی آئی اے کے مطابق اس تاریخی معاہدے کے تحت کارگو کو پاکستان اور لندن سے ریاض منتقل کیا جائے گا، جہاں سے دونوں ایئرلائنز کے وسیع نیٹ ورک کے ذریعے سامان کو دنیا بھر میں اس کی منزل مقصود تک پہنچایا جائے گا۔
ترجمان کے مطابق یہ معاہدہ 29 اکتوبر سے باقاعدہ طور پر نافذ العمل ہوگیا ہے، اور اس کا بنیادی مقصد پی آئی اے کے کارگو آپریشنز میں توسیع اور ادارے کے ریونیو میں نمایاں اضافہ کرنا ہے۔
پی آئی اے کے ترجمان نے کہا کہ یہ اشتراک فضائی کارگو کی تیزی سے بڑھتی ہوئی عالمی طلب کو پورا کرنے کے لیے ایک اہم سنگ میل ثابت ہوگا۔ انہوں نے مزید کہا کہ پی آئی اے اس شراکت داری کو اپنی مضبوط کاروباری حکمت عملی کا حصہ سمجھتی ہے، جو قومی ایئرلائن کو بین الاقوامی مارکیٹ میں دوبارہ مستحکم مقام حاصل کرنے میں مدد دے گی۔
ذرائع کے مطابق اس معاہدے کے تحت کارگو سروسز کے دائرہ کار میں اضافہ کیا جائے گا، جس سے نہ صرف پاکستان کی برآمدات میں سہولت پیدا ہوگی بلکہ کاروباری طبقے کے لیے بھی تیز اور محفوظ تر رسائی ممکن بنے گی۔
پی آئی اے حکام کا کہنا ہے کہ مستقبل میں ریاض ایئر کے ساتھ مزید تعاون کے امکانات پر بھی غور کیا جا رہا ہے تاکہ نئے روٹس، جدید سروسز اور عالمی معیار کے کارگو نیٹ ورک کو فروغ دیا جا سکے۔
یہ معاہدہ ایسے وقت میں سامنے آیا ہے جب قومی ایئرلائن اپنی نجکاری کے عمل اور آپریشنل بحالی کے مرحلے سے گزر رہی ہے، اور ماہرین کے مطابق یہ قدم پی آئی اے کے لیے آمدن بڑھانے اور بین الاقوامی ساکھ بحال کرنے کی سمت ایک مثبت اشارہ ہے۔
