ریاض: سعودی عرب نے دنیا کا پہلا اسکائی اسٹیڈیم بنانے کا منفرد اور تاریخی منصوبہ تیار کر لیا ہے۔
عرب میڈیا کے مطابق یہ جدید ترین اسٹیڈیم نیوم شہر میں تعمیر کیا جائے گا، جو سعودی عرب کا مستقبل کا اسمارٹ اور جدید میگا سٹی منصوبہ ہے۔
رپورٹ کے مطابق اسکائی اسٹیڈیم سمندر کی سطح سے 350 میٹر کی بلندی پر تعمیر کیا جائے گا، اور توقع ہے کہ یہ 2032 تک مکمل ہوگا۔ ذرائع کا کہنا ہے کہ یہاں 2034 کے فیفا ورلڈکپ کے میچز کھیلے جانے کا بھی امکان ہے، جس سے یہ مقام عالمی فٹبال کا ایک اہم مرکز بن سکتا ہے۔
عرب میڈیا کے مطابق اسٹیڈیم میں 46 ہزار تماشائیوں کے بیٹھنے کی گنجائش ہوگی، جبکہ اس کی تعمیر میں جدید ٹیکنالوجی اور ماحول دوست مواد کا استعمال کیا جائے گا تاکہ اسے پائیدار اور توانائی کے لحاظ سے خود کفیل بنایا جا سکے۔
سوشل میڈیا پر اسکائی اسٹیڈیم کے متاثر کن ڈیزائن کی تصاویر اور ویڈیوز تیزی سے وائرل ہو رہی ہیں۔ شہری اور کھیلوں کے شوقین افراد اس منصوبے کو سعودی عرب کے وژن 2030 کا ایک بڑا سنگ میل قرار دے رہے ہیں، جو ملک کو سیاحت، کھیلوں اور جدید تعمیرات کے عالمی نقشے پر مزید نمایاں کرے گا۔
