پشاور: خیبر پختونخوا کی 13 رکنی نئی صوبائی کابینہ تشکیل دے دی گئی ہے، گورنر فیصل کریم کنڈی نے وزیراعلیٰ سہیل آفریدی کی جانب سے بھیجی گئی سمری پر دستخط کر دیے۔ کابینہ کی حلف برداری کی تقریب آج سہ پہر 3 بجے گورنر ہاؤس پشاور میں منعقد ہوگی۔
تفصیلات کے مطابق نئی کابینہ میں 10 وزراء، 2 مشیر اور ایک معاونِ خصوصی شامل ہیں۔ وزیراعلیٰ خیبر پختونخوا نے مزمل اسلم اور تاج محمد ترند کو اپنے مشیر جبکہ شفیع اللہ جان کو معاونِ خصوصی مقرر کیا ہے۔
کابینہ میں مینا خان، فضل شکور، فیصل ترکئی، عاقب اللہ، ارشد ایوب خان، خلیق الرحمان اور ڈاکٹر امجد کو شامل کیا گیا ہے، جبکہ بونیر سے ریاض خان اور فخر جہاں بھی کابینہ کا حصہ ہوں گے۔
ذرائع کے مطابق نئی کابینہ کی تشکیل صوبے میں سیاسی توازن برقرار رکھنے اور مختلف اضلاع کی نمائندگی کو مدنظر رکھتے ہوئے کی گئی ہے۔ حلف برداری کی تقریب میں گورنر خیبر پختونخوا، وزیراعلیٰ سہیل آفریدی، صوبائی سیکریٹریز اور دیگر اعلیٰ حکام کی شرکت متوقع ہے۔
سیاسی تجزیہ کاروں کا کہنا ہے کہ نئی کابینہ کی تشکیل کے بعد صوبے میں حکومتی سرگرمیوں میں تیزی آئے گی اور مختلف محکموں میں پالیسی فیصلے جلد متوقع ہیں۔
