کراچی کے علاقے ڈیفنس میں واقع میجر خالد شہید پارک میں بڑی تعداد میں مردہ کوؤں کی مبینہ ویڈیو سوشل میڈیا پر وائرل ہوگئی ہے۔ یہ ویڈیو معروف موسیقار بلال مقصود نے شیئر کی، جنہوں نے دعویٰ کیا کہ گزشتہ چند دنوں سے پارک میں روزانہ دو سے تین مردہ کوّے نظر آرہے تھے، مگر آج صورتحال غیر معمولی تھی کیونکہ تقریباً 50 سے 60 مردہ کوّے زمین پر پڑے دکھائی دیے۔
بلال مقصود نے اپنی پوسٹ میں تشویش کا اظہار کرتے ہوئے کہا کہ یہ کوئی عام واقعہ نہیں لگتا اور متعلقہ اداروں کو اس معاملے کی فوری تحقیقات کرنی چاہئیں تاکہ وجہ سامنے آسکے۔
اس حوالے سے ترجمان ہارٹیکلچر سوسائٹی رفیع الحق نے وضاحت کرتے ہوئے کہا کہ کوّے اور چیلیں زیادہ تر کچرے سے اپنی خوراک حاصل کرتے ہیں، اور امکان ہے کہ پرندے زہر آلود کھانے یا کچرے سے زہر خوانی کا شکار ہوئے ہوں۔ انہوں نے بتایا کہ سوسائٹی نے بھی واقعے کی اطلاع متعلقہ محکموں کو دے دی ہے تاکہ معاملے کی سائنسی بنیادوں پر جانچ ہو سکے۔
دوسری جانب، محکمہ جنگلی حیات سندھ کی ٹیم نے بھی پارک کا دورہ کیا۔ تاہم حکام کے مطابق پارک میں صفائی ستھرائی ہوچکی تھی اور کچرا کنڈیاں خالی ہونے کی وجہ سے کوئی نمونہ یا ثبوت نہیں مل سکا۔ ٹیم کے پہنچنے کے وقت مردہ کوّے یا چیلیں بھی پارک میں موجود نہیں تھیں، جس کے باعث واقعے کی حقیقی وجہ جانچنے میں مشکلات درپیش ہیں۔
علاقہ مکینوں نے بھی خدشہ ظاہر کیا ہے کہ یہ واقعہ زہریلے مادے یا کسی ماحولیاتی آلودگی کا نتیجہ ہو سکتا ہے، اس لیے مکمل تحقیق ضروری ہے تاکہ مستقبل میں ایسے واقعات سے بچاؤ ممکن بنایا جا سکے۔
