پشاور: وزیراعلیٰ خیبر پختونخوا سہیل آفریدی نے خیبر ٹیچنگ اسپتال میں بغیر اطلاع صحت کارڈ کی بندش کا سخت نوٹس لے لیا۔
ذرائع کے مطابق وزیراعلیٰ خیبر پختونخوا نے اچانک خیبر ٹیچنگ اسپتال کا دورہ کیا اور مریضوں کو فراہم کی جانے والی سہولیات کا تفصیلی جائزہ لیا۔ دورے کے دوران انہیں یہ اطلاع ملی کہ اسپتال میں آٹھ گھنٹے کے لیے صحت کارڈ سروس بند رہی، جس پر وزیراعلیٰ نے برہمی کا اظہار کرتے ہوئے فوری انکوائری کا حکم دے دیا۔
سہیل آفریدی نے متعلقہ حکام کو ہدایت کی کہ صحت کارڈ کے تحت علاج کی فراہمی میں کسی قسم کی رکاوٹ یا تاخیر برداشت نہیں کی جائے گی۔ انہوں نے واضح کیا کہ صحت کارڈ کی مد میں فنڈز جاری کیے جا چکے ہیں، اس لیے عوام کو علاج کی سہولت میں کسی بھی سطح پر مشکلات کا سامنا نہیں ہونا چاہیے۔
وزیراعلیٰ نے اسپتال انتظامیہ کو ہدایت دی کہ مریضوں کے لیے تمام سہولیات بلا تعطل فراہم کی جائیں اور مستقبل میں اس نوعیت کی شکایات سے بچنے کے لیے مؤثر نظام وضع کیا جائے۔
