کراچی: گلستان جوہر میں لگنے والی خوفناک آگ نے درجنوں جھونپڑیاں، خانہ بدوشوں کا سامان اور متعدد موٹرسائیکلیں جلا ڈالیں۔
تفصیلات کے مطابق کراچی کے علاقے گلستان جوہر بلاک 10 میں ایک جھونپڑی میں اچانک آگ بھڑک اٹھی، جو دیکھتے ہی دیکھتے اردگرد کی کئی جھونپڑیوں تک پھیل گئی۔ شعلوں نے پورے علاقے کو اپنی لپیٹ میں لے لیا، جس سے قریبی آبادی میں بھی خوف و ہراس پھیل گیا۔
عینی شاہدین کے مطابق بجلی کی تاریں ٹکرانے سے شاٹ سرکٹ ہوا جس کے نتیجے میں یہ افسوسناک واقعہ پیش آیا۔ ابتدائی طور پر ایک فائر ٹینڈر جائے وقوعہ پر پہنچا اور آگ بجھانے کی کوشش کی، تاہم شعلوں کی شدت کے باعث مزید امدادی ٹیموں کو طلب کرنا پڑا۔
ریسکیو حکام کے مطابق آبادی تک آگ پھیلنے کے خطرے کے باعث مزید فائر ٹینڈرز موقع پر پہنچے، اور پانچ فائر فائٹرز نے دو گھنٹے کی جدوجہد کے بعد آگ پر قابو پا لیا۔ تاہم آگ بجھانے کے دوران کئی جھونپڑیاں مکمل طور پر جل کر راکھ ہو گئیں جبکہ خانہ بدوشوں کا گھریلو سامان، کپڑے اور قیمتی اشیاء بھی ضائع ہو گئیں۔
فائر آفیسر کے مطابق اس واقعے میں متعدد موٹرسائیکلیں جل گئیں جبکہ کئی مویشی بھی جھلس گئے۔ خوش قسمتی سے کسی انسانی جان کے ضائع ہونے کی اطلاع نہیں ملی، تاہم متاثرہ خاندان کھلے آسمان تلے آگئے ہیں۔
ریسکیو ٹیموں نے آگ بجھانے کے بعد کولنگ کا عمل مکمل کیا جبکہ مقامی انتظامیہ نے واقعے کی تحقیقات شروع کر دی ہیں تاکہ آگ لگنے کی اصل وجہ کا تعین کیا جا سکے۔
