اسلام آباد:وزارت اطلاعات و نشریات کے مطابق افغان ترجمان نے استنبول مذاکرات سے متعلق حقائق کو توڑ مروڑ کر پیش کیا۔
وزارت نے واضح کیا کہ پاکستان نے مذاکرات کے دوران افغان سرزمین پر موجود دہشت گردوں کی گرفتاری کا مطالبہ کیا تھا۔
بیان میں کہا گیا کہ افغان فریق کے دعوے کے برعکس، پاکستان نے فوری طور پر دہشت گردوں کی تحویل کی پیشکش کی تھی اور یہ بھی واضح کیا تھا کہ دہشت گردوں کی حوالگی سرحدی انٹری پوائنٹس کے ذریعے ممکن ہے۔
وزارت اطلاعات کے مطابق پاکستان کا مؤقف ہمیشہ سے واضح، مستقل اور ریکارڈ پر موجود ہے۔ افغانستان کی جانب سے جھوٹے اور گمراہ کن بیانات حقائق کے منافی ہیں اور ان کا مقصد دونوں ممالک کے درمیان اعتماد کے ماحول کو متاثر کرنا ہے۔
پاکستان نے ایک بار پھر زور دیا کہ دہشت گردی کے خلاف جنگ مشترکہ ذمہ داری ہے اور افغانستان اپنی سرزمین کو دہشت گرد عناصر کی پناہ گاہ کے طور پر استعمال ہونے سے روکنے کے لیے عملی اقدامات کرے۔
