لاہور: وزیر اعلیٰ پنجاب مریم نواز شریف نے آزادی صحافت اور صحافیوں کے حقوق کے تحفظ کے عزم کا اظہار کرتے ہوئے کہا ہے کہ ان کی حکومت صحافت کی آزادی اور صحافی برادری کے تحفظ کے لیے ہر ممکن اقدامات کر رہی ہے۔
صحافیوں کے خلاف جرائم کے خاتمے کے عالمی دن کے موقع پر اپنے پیغام میں مریم نواز نے کہا کہ صحافت کی آزادی جمہوریت کی اساس ہے اور آزاد صحافت ہی معاشرتی انصاف اور شفاف حکمرانی کی ضمانت ہے۔ انہوں نے کہا کہ حق و سچ کی آواز بلند کرنے والے صحافی معاشرتی بیداری کے ستون ہیں اور ان پر کسی بھی قسم کا دباؤ یا تشدد ناقابلِ قبول ہے۔
مریم نواز نے مزید کہا کہ مضبوط جمہوری معاشرہ اسی وقت ممکن ہے جب صحافی آزادی کے ساتھ اپنا کردار ادا کر سکیں۔ انہوں نے بتایا کہ حکومت پنجاب صحافیوں کے حقوق کے تحفظ کے لیے مختلف عملی اقدامات کر رہی ہے، جن میں صحافیوں کے لیے فلاحی منصوبے اور ان کی رہائش کے مسائل کا حل بھی شامل ہے۔
وزیر اعلیٰ نے کہا کہ حکومت بے گھر صحافیوں کو اپنی چھت فراہم کرنے کے لیے پرعزم ہے، اور پنجاب میں ایسی پالیسی اپنائی جا رہی ہے جس کے تحت ہر صحافی کو محفوظ اور باعزت ماحول میں کام کرنے کا حق حاصل ہو۔
مریم نواز نے اپنے پیغام میں کہا کہ آج کا دن اُن بہادر صحافیوں کو یاد کرنے کا دن ہے جنہوں نے سچ کی خاطر اپنی جانیں قربان کیں۔ انہوں نے یقین دہانی کرائی کہ پنجاب میں صحافیوں کے خلاف تشدد یا قتل کے واقعات نہ تو برداشت کیے جائیں گے اور نہ ہی ایسے واقعات ہونے دیے جائیں گے۔
وزیر اعلیٰ پنجاب مریم نواز شریف نے اس عزم کا اعادہ کیا کہ وہ بحیثیت وزیر اعلیٰ صحافت کی آزادی کی محافظ ہیں اور حکومت ہر سطح پر صحافیوں کے حقوق کی حفاظت کو یقینی بنائے گی تاکہ سچ بولنے والی آوازیں ہمیشہ بلند رہیں۔
