ایشیز سیریز کی تیاریوں کے پیش نظر آسٹریلیا کے کئی اہم کھلاڑی بھارت کے خلاف جاری ٹی ٹوئنٹی سیریز سے دستبردار ہونے لگے ہیں۔ کرکٹ آسٹریلیا نے تصدیق کی ہے کہ انگلینڈ کے خلاف تاریخی سیریز سے قبل کھلاڑیوں کو ریڈ بال کرکٹ کی تیاری کے لیے موقع فراہم کیا جا رہا ہے۔
رپورٹس کے مطابق شیفلڈ شیلڈ کے اگلے راؤنڈ میں آسٹریلیا کے ممکنہ ٹیسٹ اسکواڈ کے تمام کھلاڑی ایکشن میں ہوں گے تاکہ وہ ایشیز سیریز کے لیے مکمل فارم میں آ سکیں۔ اسی مقصد کے تحت ٹریوس ہیڈ کو ٹی ٹوئنٹی اسکواڈ سے ریلیز کر دیا گیا ہے، وہ بھارت کے خلاف آخری دو میچز میں حصہ نہیں لیں گے۔
شیفلڈ شیلڈ کے چوتھے راؤنڈ میں مچل اسٹارک، اسٹیو اسمتھ، جوش ہیزل ووڈ اور ٹریوس ہیڈ جیسے بڑے نام شرکت کریں گے، جو ایشیز کی تیاریوں کا حصہ ہیں۔ ذرائع کے مطابق آسٹریلوی بورڈ کھلاڑیوں کی فٹنس اور فارم پر خاص توجہ دے رہا ہے تاکہ انگلینڈ کے خلاف میدان میں بہترین کمبی نیشن اتارا جا سکے۔
جوش ہیزل ووڈ اور شین ایبٹ بھی ٹی ٹوئنٹی اسکواڈ چھوڑ کر ڈومیسٹک ریڈ بال کرکٹ میں مصروف ہو گئے ہیں۔ اسی طرح نوجوان بولر تنویر سانگھا کو بھی اسکواڈ سے ریلیز کر دیا گیا ہے تاکہ وہ ون ڈے کپ میں حصہ لے سکیں۔ ان کی جگہ بین ڈار شیوس کو بھارت کے خلاف سیریز کے باقی میچز کے لیے اسکواڈ میں شامل کیا گیا ہے۔
واضح رہے کہ بھارت اور آسٹریلیا کے درمیان پانچ ٹی ٹوئنٹی میچوں کی سیریز اس وقت ایک ایک سے برابر ہے، جب کہ چوتھا اور پانچواں میچ بالترتیب 6 اور 8 نومبر کو کھیلا جائے گا۔ تجزیہ کاروں کے مطابق آسٹریلیا کی ٹیم مستقبل قریب میں ٹیسٹ کرکٹ پر اپنی توجہ مرکوز رکھے ہوئے ہے، جس کا ثبوت بڑے کھلاڑیوں کی قبل از وقت واپسی ہے۔
