نیویارک میراتھون 2025 کا اختتام ایک سنسنی خیز لمحے پر ہوا جب کینیا کے دو ایتھلیٹس کے درمیان فاصلہ محض ایک سیکنڈ کا رہ گیا۔
کینیا کے کپروٹو (Kipruto) نے زبردست مقابلے کے بعد 2 گھنٹے 8 منٹ اور 9 سیکنڈ میں فائنل لائن عبور کرکے پہلی پوزیشن حاصل کی، جبکہ ان کے ہم وطن الیگزینڈر موٹیسو (Alexander Mutiso) ایک سیکنڈ کے معمولی فرق سے دوسرے نمبر پر رہے۔
خواتین کے مقابلے میں بھی کینیا نے اپنی برتری برقرار رکھی۔ کینیا کی ہیلن اوبیری (Hellen Obiri) نے شاندار کارکردگی کا مظاہرہ کرتے ہوئے 2 گھنٹے 19 منٹ اور 51 سیکنڈ میں دوڑ مکمل کی اور ایک نیا ریکارڈ قائم کیا۔
دنیا کی سب سے بڑی میراتھون میں اس سال 50 ہزار سے زائد رنرز نے حصہ لیا، جنہوں نے نیویارک کی سڑکوں پر 42 کلومیٹر طویل فاصلہ طے کیا۔ اس بین الاقوامی ایونٹ میں 20 سے زیادہ پاکستانی رنرز نے بھی شرکت کی، جن میں سارہ طہور نے نمایاں کارکردگی دکھاتے ہوئے 3 گھنٹے 34 منٹ میں دوڑ مکمل کی اور ’’سکس اسٹار فنشر‘‘ کا اعزاز حاصل کرلیا، جو عالمی میراتھون رنرز کے لیے ایک بڑا سنگ میل سمجھا جاتا ہے۔
نیویارک میراتھون کی انتظامیہ کے مطابق اس سال کا ایونٹ نہ صرف سخت مقابلے کی فضا سے بھرپور رہا بلکہ اس میں دنیا بھر کے رنرز نے امن، استقامت اور کھیل کے عالمی جذبے کا عملی مظاہرہ کیا۔
