وفاقی وزیر اطلاعات عطا تارڑ نے کہا ہے کہ وزیراعظم شہباز شریف نے خیبر پختونخوا کے وزیراعلیٰ کو ہر ممکن تعاون کی پیشکش کی تھی تاکہ صوبے میں امن و امان کی صورتحال کو بہتر بنایا جا سکے۔ انہوں نے کہا کہ سیاست اپنی جگہ لیکن عوامی مفاد کے معاملات میں بات چیت اور تعاون ناگزیر ہے۔
جیو نیوز کے پروگرام "نیا پاکستان” میں گفتگو کرتے ہوئے عطا تارڑ نے کہا کہ سیاست کرنا ہر کسی کا حق ہے، مگر خیبر پختونخوا کے معاملات کو سنجیدگی سے دیکھنا وزیراعلیٰ کی آئینی ذمہ داری ہے۔ ان کا کہنا تھا کہ وفاقی حکومت نے ہمیشہ صوبوں کے ساتھ تعاون کیا ہے، لیکن بدقسمتی سے بعض رہنماؤں نے سیاسی اختلافات کو ترجیح دی۔
عطا تارڑ نے نیشنل ایکشن پلان سے متعلق ہونے والے اجلاس میں وزیراعلیٰ خیبر پختونخوا کی غیر موجودگی پر بھی افسوس کا اظہار کیا۔ انہوں نے کہا کہ دہشت گردی کے خاتمے کے لیے مشترکہ لائحہ عمل ضروری ہے اور اگر وزیراعلیٰ یا ان کے نمائندے اجلاس میں شریک ہوتے تو بہتر فیصلے کیے جا سکتے تھے۔
وفاقی وزیر اطلاعات کا کہنا تھا کہ بیانات دینے سے مسائل حل نہیں ہوتے، عملی اقدامات اور باہمی رابطے ہی ملک میں پائیدار امن کے قیام کی ضمانت ہیں۔ انہوں نے ایک بار پھر واضح کیا کہ وفاقی حکومت تمام صوبوں کے ساتھ مل کر دہشت گردی کے خاتمے کے لیے پرعزم ہے۔
