پاکستان تحریک انصاف کے سیکرٹری جنرل سلمان اکرم راجا نے لاہور میں پاکستان کڈنی اینڈ لیور انسٹی ٹیوٹ (پی کے ایل آئی) میں زیر علاج پارٹی کے وائس چیئرمین شاہ محمود قریشی سے ملاقات کی۔ ملاقات کے دوران انہوں نے شاہ محمود قریشی کی خیریت دریافت کی، ان کی جلد صحت یابی کے لیے دعا کی اور موجودہ سیاسی حالات پر تفصیلی تبادلہ خیال کیا۔
ذرائع کے مطابق ملاقات میں پی ٹی آئی رہنما شوکت بسرا اور ظہیر بابر بھی موجود تھے۔ سیاسی صورتِ حال پر گفتگو کے دوران ملک میں جاری سیاسی کشیدگی، پارٹی کے اندرونی معاملات اور آئندہ کے لائحہ عمل پر بھی بات ہوئی۔ سلمان اکرم راجا نے شاہ محمود قریشی سے ان رہنماؤں کی ملاقاتوں کا بھی ذکر کیا جو حالیہ دنوں میں ان سے مل چکے ہیں، جن میں فواد چوہدری سمیت دیگر سابق اور ناراض رہنما شامل ہیں۔
ذرائع کے مطابق پی ٹی آئی کے سابق رہنماؤں نے عمران خان کی رہائی کے لیے مختلف سیاسی جماعتوں سے رابطے کرنے کا فیصلہ کیا ہے۔ اس سلسلے میں مسلم لیگ (ن) کے رہنماؤں اور پارٹی کے بانی ارکان سے ملاقات کے امکانات ظاہر کیے جا رہے ہیں۔
ذرائع کا کہنا ہے کہ پی ٹی آئی کی سابق قیادت ملک میں سیاسی درجہ حرارت کم کرنے اور تصفیے کی فضا پیدا کرنے کی کوشش کر رہی ہے۔ اس حوالے سے ہونے والی ملاقاتوں میں شاہ محمود قریشی سے بھی اپیل کی گئی کہ وہ معاملات کو بہتر بنانے اور مفاہمت کے عمل کو آگے بڑھانے میں کردار ادا کریں۔
مزید اطلاعات کے مطابق سابق رہنماؤں نے اعجاز چوہدری، میاں محمود الرشید اور عمر سرفراز چیمہ سے بھی ملاقات کی، جس میں مجموعی سیاسی منظرنامے اور مستقبل کے ممکنہ سیاسی اتحادوں پر غور کیا گیا۔ تجزیہ کاروں کے مطابق حالیہ ملاقاتیں اس بات کی نشاندہی کرتی ہیں کہ ملک کی سیاست ایک بار پھر مفاہمت کی نئی راہوں کی طرف بڑھ رہی ہے۔
