گورنر سندھ کامران ٹیسوری نے کراچی میں سرعام اسلحہ کی نمائش اور فائرنگ کے واقعے کا سخت نوٹس لیتے ہوئے آئی جی سندھ کو ہدایت کی ہے کہ واقعے میں ملوث ملزم کے خلاف فوری اور مؤثر قانونی کارروائی کی جائے۔
گورنر سندھ نے اپنے بیان میں کہا کہ شہریوں پر بندوق تاننا کسی صورت قابلِ قبول نہیں، اس طرح کے واقعات قانون کی عملداری اور عوامی تحفظ کے لیے خطرہ ہیں۔ ان کا کہنا تھا کہ اگر قانون سب کے لیے برابر ہوگا تو عوام کا پولیس اور انصاف کے نظام پر اعتماد بحال رہے گا۔
کامران ٹیسوری نے واقعے کے دوران ڈمپر کی ٹکر سے جاں بحق ہونے والے شخص کے لواحقین سے دلی تعزیت کا اظہار کیا اور زخمی اہلیہ کے لیے مکمل طبی سہولیات فراہم کرنے کی ہدایت بھی دی۔
انہوں نے مزید کہا کہ کراچی میں ٹریفک قوانین کی خلاف ورزیوں کے خلاف کارروائیاں تیز کر دی گئی ہیں اور خلاف ورزی کرنے والوں پر بھاری چالان عائد کیے جا رہے ہیں۔ گورنر سندھ نے زور دیا کہ ایسے ڈرائیورز جو لاپرواہی یا تیز رفتاری کے باعث قیمتی جانیں ضائع کرتے ہیں، انہیں عبرتناک سزائیں دی جائیں تاکہ مستقبل میں اس قسم کے واقعات کی روک تھام ممکن ہو سکے۔
