ائیرکرافٹ انجینئرز کا احتجاج، ملک بھر میں قومی ائیرلائن کا فلائٹ آپریشن رک گیا

قومی ایئرلائن (پی آئی اے) کے انتظامیہ اور ایئرکرافٹ انجینئرز کے درمیان تنازع نے سنگین صورتحال اختیار کر لی ہے، جس کے باعث ملک بھر میں قومی ایئرلائن کا فلائٹ آپریشن معطل ہو گیا۔ ایئرکرافٹ انجینئرز نے طیاروں کی کلیئرنس روک دی ہے جس کے نتیجے میں پیر کی رات آٹھ بجے کے بعد سے بین الاقوامی پروازیں روانہ نہیں ہو سکیں۔

ذرائع کے مطابق احتجاج کے باعث اب تک 12 بین الاقوامی پروازیں متاثر ہو چکی ہیں جبکہ درجنوں پروازیں تاخیر یا منسوخی کا شکار ہیں۔ متاثرہ مسافروں میں عمرہ زائرین کی بڑی تعداد بھی شامل ہے جو ایئرپورٹس پر پریشان حال ہیں۔

سوسائٹی آف ایئرکرافٹ انجینئرز نے واضح کیا ہے کہ وہ سی ای او قومی ایئرلائن کے رویے میں بہتری آنے تک اپنے فرائض انجام نہیں دیں گے اور طیاروں کو اڑان کے لیے کلیئرنس نہیں دی جائے گی۔ انجینئرز کا مؤقف ہے کہ ان پر طیاروں کے قواعد کے خلاف کلیئرنس دینے کے لیے دباؤ ڈالا جاتا ہے، جو مسافروں کی جانوں کو خطرے میں ڈالنے کے مترادف ہے۔

ذرائع کے مطابق انجینئرز گزشتہ ڈھائی ماہ سے اپنے مطالبات کے حق میں بازوؤں پر کالی پٹیاں باندھ کر پرامن احتجاج کر رہے تھے، تاہم قومی ایئرلائن انتظامیہ کی جانب سے کسی بھی سطح پر بات چیت یا مسائل کے حل کی کوشش نہیں کی گئی۔

انجینئرز کے مطابق ان کی تنخواہیں گزشتہ 8 سال سے نہیں بڑھائی گئیں جبکہ ایئرلائن کے پاس طیاروں کے فاضل پرزہ جات کی شدید قلت ہے، جس سے پروازوں کی حفاظت پر بھی سوالات اٹھ رہے ہیں۔

دوسری جانب قومی ایئرلائن کے چیف ایگزیکٹو آفیسر (سی ای او) نے صورتحال کا سخت نوٹس لیتے ہوئے ہدایت کی ہے کہ فلائٹ آپریشن متاثر کرنے والے تمام ایئرکرافٹ انجینئرز کے خلاف کارروائی کی جائے۔

ترجمان پی آئی اے کے مطابق سوسائٹی آف ایئرکرافٹ انجینئرز کی کوئی قانونی حیثیت نہیں ہے، اور ان کا احتجاج دراصل قومی ایئرلائن کی مجوزہ نجکاری کو سبوتاژ کرنے کی کوشش ہے۔ ترجمان نے کہا کہ سیفٹی کے نام پر بیک وقت کام چھوڑ دینا ایک منظم سازش ہے جس کا مقصد مسافروں کو مشکلات میں ڈالنا اور انتظامیہ پر ناجائز دباؤ ڈالنا ہے۔

ترجمان کے مطابق قومی ایئرلائن میں لازمی سروسز ایکٹ نافذ ہے، جس کے تحت ہڑتال یا کام چھوڑ دینا قانونی جرم ہے۔ ایسے تمام افراد کے خلاف قانونی کارروائی کی جائے گی جو اس عمل میں شریک ہیں یا اس کی حمایت کر رہے ہیں۔

ترجمان نے مزید کہا کہ انتظامیہ نے متبادل انجینئرنگ خدمات حاصل کرنے کے لیے دیگر ایئرلائنز سے رابطہ کر لیا ہے اور جلد ہی پروازوں کی روانگی بحال کر دی جائے گی۔