پروونشل ڈیزاسٹر مینجمنٹ اتھارٹی (پی ڈی ایم اے) نے خیبرپختونخوا کے مختلف اضلاع میں بارشوں اور برفباری کا الرٹ جاری کردیا ہے۔
محکمہ نے پیشگوئی کی ہے کہ صوبے کے پہاڑی اور میدانی علاقوں میں آج سے 5 نومبر تک وقفے وقفے سے بارشیں اور بعض مقامات پر برفباری متوقع ہے۔ اس حوالے سے تمام ضلعی انتظامیہ کو ہدایت کی گئی ہے کہ ممکنہ صورتحال سے نمٹنے کے لیے پیشگی اقدامات کیے جائیں۔
پی ڈی ایم اے کے مطابق مسلسل یا شدید بارش کے باعث پہاڑی علاقوں میں لینڈ سلائیڈنگ کا خطرہ موجود ہے، جس کے نتیجے میں بعض مقامات پر سڑکوں کی بندش کا خدشہ بھی ظاہر کیا گیا ہے۔
اتھارٹی نے عوام سے اپیل کی ہے کہ غیر ضروری سفر سے گریز کریں، خاص طور پر برفباری یا لینڈ سلائیڈنگ کے خطرے والے علاقوں میں احتیاط برتیں اور مقامی انتظامیہ کی ہدایات پر عمل کریں۔
