پاکستانی اداکار زاہد احمد نے سوشل میڈیا پر اپنے متنازع بیان کی وضاحت کرتے ہوئے کہا ہے کہ ان کے الفاظ کو غلط سمجھا گیا اور ان کا مقصد کسی کی دل آزاری نہیں تھا۔
حال ہی میں ایک پوڈکاسٹ میں زاہد احمد نے سوشل میڈیا اور ڈیجیٹل کریئیٹرز کے بارے میں گفتگو کی تھی جس کے بعد ان کے الفاظ پر شدید تنقید سامنے آئی۔
بعدازاں اداکار نے انسٹاگرام پر ایک ویڈیو پیغام جاری کیا جس میں انہوں نے کہا کہ "میرے بیان کا مطلب غلط لیا گیا، میں سوشل میڈیا بنانے والوں کے بارے میں بات کررہا تھا، ڈیجیٹل کریئیٹرز کے بارے میں نہیں۔ میں نے جذبات میں آکر انہیں جہنمی کہا جو میری غلطی تھی۔ مجھے افسوس ہے کیونکہ جنت یا جہنم کا فیصلہ کرنا میرا نہیں بلکہ اللّٰہ کا کام ہے۔”
انہوں نے مزید کہا کہ "میں اپنی بات اس لیے درست کرنا چاہتا تھا کیونکہ مجھ سے بہت سے نوجوان متاثر ہوتے ہیں، میں نہیں چاہتا کہ دین کے حوالے سے کوئی غلط تاثر جائے۔”
زاہد احمد کی اس وضاحت پر سوشل میڈیا صارفین نے مختلف ردعمل دیا۔ کچھ نے ان کی تعریف کرتے ہوئے کہا کہ اپنی غلطی تسلیم کرنا ایک قابلِ ستائش عمل ہے، جبکہ دیگر نے طنزاً کہا کہ "زاہد احمد کا سافٹ ویئر اپڈیٹ ہوگیا ہے” یعنی انہوں نے عوامی دباؤ کے باعث مؤقف بدل لیا۔
