دبئی کو دنیا کا خوبصورت ترین شہر بنانے کے لیے 18 ارب درہم کا نیا ترقیاتی منصوبہ منظور کرلیا گیا۔ اس منصوبے کا اعلان دبئی کے ولی عہد شیخ حمدان بن محمد بن راشد المکتوم نے کیا، جس کا مقصد شہر کو فطرت، جدیدیت اور پائیدار ترقی کا عالمی نمونہ بنانا ہے۔
اعلان کے مطابق پبلک پارکس اینڈ گرینری کے منصوبے کے تحت دبئی بھر میں 630 نئے پارکس تعمیر کیے جائیں گے، جن میں شہریوں اور سیاحوں کے لیے تفریحی، ماحولیاتی اور کھیلوں کی جدید سہولیات فراہم کی جائیں گی۔ اس منصوبے سے نہ صرف ماحول دوست طرزِ زندگی کو فروغ ملے گا بلکہ دبئی کے شہری منظرنامے کو بھی عالمی معیار کے مطابق ڈھالا جائے گا۔
اس کے ساتھ ساتھ اسپورٹس اسٹریٹیجک پلان 2033 کے تحت 75 نئے اقدامات متعارف کرائے جائیں گے تاکہ دبئی کو دنیا کا سب سے بڑا عالمی اسپورٹس حب بنایا جا سکے۔ ان اقدامات میں کھیلوں کے بنیادی ڈھانچے کی ترقی، نوجوانوں کی شمولیت، بین الاقوامی مقابلوں کی میزبانی، اور مختلف کھیلوں کے لیے عالمی معیار کی سہولیات شامل ہیں۔
شیخ حمدان بن محمد نے کہا کہ دبئی کی ترقی کا سفر اب اس مرحلے میں داخل ہو چکا ہے جہاں فطرت اور جدت کو ایک ساتھ لے کر آگے بڑھنا ہے۔ ان کے مطابق، یہ منصوبہ نہ صرف دبئی کے موجودہ شہری ڈھانچے کو بہتر بنائے گا بلکہ آنے والی نسلوں کے لیے ایک پائیدار اور خوشحال ماحول فراہم کرے گا۔
تجزیہ کاروں کے مطابق 18 ارب درہم مالیت کا یہ منصوبہ دبئی کو آئندہ دہائی میں دنیا کے سب سے جدید، پائیدار اور خوبصورت شہروں میں شامل کر دے گا۔
