امریکا کی جانب سے سعودی عرب کو جدید ایف 35 لڑاکا طیارے فروخت کرنے پر غور کیا جا رہا ہے۔ بین الاقوامی خبر ایجنسی کے مطابق سعودی عرب نے امریکی حکومت سے 48 ایف 35 طیارے خریدنے کی باضابطہ درخواست دی تھی، جس کے بعد ٹرمپ انتظامیہ نے اس درخواست کا جائزہ لینا شروع کر دیا ہے۔
رپورٹ میں بتایا گیا ہے کہ اربوں ڈالر مالیت کے اس ممکنہ دفاعی معاہدے کے لیے ابھی ٹرمپ کابینہ اور امریکی کانگریس کی حتمی منظوری درکار ہے۔ تاہم اس معاملے پر پینٹاگون، وائٹ ہاؤس اور محکمہ خارجہ کی جانب سے فی الحال کوئی تبصرہ نہیں کیا گیا۔
ذرائع کے مطابق سعودی عرب نے رواں سال کے آغاز میں اس منصوبے پر براہ راست امریکی صدر ڈونلڈ ٹرمپ سے بات چیت کی تھی۔ ایف 35 طیارے امریکی کمپنی لاک ہیڈ مارٹن کی جدید ترین مصنوعات ہیں، جو اس وقت دنیا کے سب سے جدید اور اسٹیلتھ ٹیکنالوجی سے لیس لڑاکا طیاروں میں شمار ہوتے ہیں۔
رپورٹ میں مزید کہا گیا ہے کہ پینٹاگون اس ممکنہ دفاعی فروخت کے تمام پہلوؤں کا جائزہ لے رہا ہے اور ابھی تک کوئی حتمی فیصلہ نہیں کیا گیا۔ تجزیہ کاروں کے مطابق اگر یہ معاہدہ طے پاتا ہے تو یہ امریکا اور سعودی عرب کے دفاعی تعلقات میں ایک بڑی پیش رفت ثابت ہو سکتا ہے۔
