کراچی: سندھ ہائیکورٹ نے نجی کورئیر کمپنی کی کنزیومر کورٹ کے فیصلے کے خلاف اپیل مسترد کرتے ہوئے چھ سال بعد صارف کے حق میں فیصلہ دے دیا۔ عدالت نے کمپنی کو حکم دیا کہ وہ صارف کو موبائل فون اور جرمانے کی رقم ادا کرے۔
کیس کی سماعت سندھ ہائیکورٹ میں جسٹس ارشد حسین خان پر مشتمل سنگل بینچ نے کی۔ وکیل درخواست گزار نے مؤقف اختیار کیا کہ صارف محمد شاہد نے اپنا موبائل فون کورئیر کمپنی کے ذریعے لاہور بھیجا تھا جو راستے میں گم ہو گیا۔ اس واقعے پر کنزیومر کورٹ نے کورئیر کمپنی کو 45 ہزار روپے جرمانہ ادا کرنے کا حکم دیا تھا، تاہم کمپنی نے فیصلے کو چیلنج کر رکھا تھا۔
عدالت نے تمام شواہد اور دلائل سننے کے بعد کنزیومر کورٹ کا فیصلہ برقرار رکھتے ہوئے نجی کورئیر کمپنی کی اپیل خارج کر دی۔ سندھ ہائیکورٹ نے اپنے فیصلے میں واضح کیا کہ صارف کو نہ صرف گم شدہ موبائل فون کی قیمت بلکہ عائد کردہ جرمانے کی رقم بھی ادا کی جائے۔ اس فیصلے کو صارفین کے حقوق کے تحفظ کے حوالے سے ایک اہم پیش رفت قرار دیا جا رہا ہے۔
