اسلام آباد: سکیورٹیز اینڈ ایکسچینج کمیشن آف پاکستان (ایس ای سی پی) نے اسٹارٹ اپس اور نئی قائم ہونے والی کمپنیوں کے لیے کارپوریٹ بینک اکاؤنٹس کھولنے کا عمل آسان اور تیز بنانے کی سمت ایک بڑا قدم اٹھایا ہے، جو اس کے "پیپر ٹو پلیٹ فارم” وژن کو مزید مضبوط بناتا ہے۔
ایس ای سی پی نے اس سلسلے میں ڈیجیٹل بینکوں کے ساتھ مفاہمتی یادداشت (ایم او یو) پر دستخط کیے ہیں، جس کا مقصد پاکستان میں کاروباری ماحول کو جدید، مؤثر اور مکمل طور پر ڈیجیٹل بنانا ہے۔
یہ شراکت داری ایس ای سی پی کے حالیہ اقدام کا تسلسل ہے جس کے تحت کارپوریٹ بینک اکاؤنٹس کھولنے کے لیے بورڈ قراردادوں کا معیاری فارمیٹ متعارف کرایا گیا تھا۔ اس فارمیٹ سے ملک بھر کی کمپنیوں کے لیے شفافیت، یکسانیت اور بینکنگ کے عمل میں ہم آہنگی پیدا کرنے میں مدد ملے گی۔
نئے ڈیجیٹل انضمام کے ذریعے ایس ای سی پی کے ای زی فائل پلیٹ فارم اور شراکت دار بینکوں کے درمیان ایک محفوظ اے پی آئی لنک قائم کیا جا رہا ہے، جس کے نتیجے میں ایک ہی دن میں کارپوریٹ بینک اکاؤنٹ کھولنے کی سہولت ممکن ہو جائے گی۔
اس اقدام سے نئی رجسٹرڈ کمپنیوں کو انتظامی تاخیر اور دستاویزی رکاوٹوں سے نجات ملے گی، جس سے وہ فوری طور پر اپنا کاروبار شروع کر سکیں گی۔
دستخط کی تقریب میں چیئرپرسن ایس ای سی پی عاکف سعید، کمشنر ذیشان رحمان خٹک سمیت متعدد ڈیجیٹل بینکوں اور تنظیموں کے سینئر عہدیداران شریک ہوئے۔
اس موقع پر چیئرپرسن عاکف سعید نے کہا کہ ایس ای سی پی ڈیجیٹل بینکوں کے ساتھ قریبی تعاون جاری رکھے گا تاکہ مالیاتی مصنوعات کی فراہمی میں ان کے کردار کو مزید مؤثر بنایا جا سکے۔
انہوں نے کہا کہ ایس ای سی پی کا مقصد کاروبار میں آسانی، مالی شمولیت اور کارپوریٹ ڈیجیٹائزیشن کو فروغ دینا ہے تاکہ ملک کے کاروباری افراد شفاف انداز میں کام کر سکیں اور رسمی مالیاتی نظام تک فوری رسائی حاصل کریں۔
یہ اقدام نہ صرف ڈیجیٹل معیشت کے فروغ کی طرف ایک اہم پیش رفت ہے بلکہ سرمایہ کاروں کے اعتماد میں اضافہ اور پاکستان میں اسٹارٹ اپ دوست ماحول تشکیل دینے میں بھی سنگِ میل ثابت ہوگا۔
