کویت سٹی: کویت نے باضابطہ طور پر اپنا نیا ڈیجیٹل اور جامع آن لائن پلیٹ فارم ’’وزٹ کویت‘‘ متعارف کرا دیا ہے، جس کے ذریعے دنیا بھر کے مسافروں کے لیے ای ویزا حاصل کرنے کا عمل تیز، شفاف اور آسان بنا دیا گیا ہے۔
گلف نیوز کی رپورٹ کے مطابق ’’وزٹ کویت‘‘ پورٹل رواں سال اگست میں متعارف کرایا گیا تھا، جو اب مکمل طور پر فعال ہو چکا ہے۔ اس جدید پلیٹ فارم کے ذریعے مسافر بغیر کسی سفارتی یا فزیکل کارروائی کے آن لائن ای ویزا کے لیے درخواست دے سکیں گے۔
رپورٹ میں بتایا گیا ہے کہ نئے نظام کے تحت چار اقسام کے ویزے — سیاحتی، خاندانی، تجارتی اور سرکاری — اب ایک ہی ڈیجیٹل پورٹل سے حاصل کیے جا سکیں گے، تاکہ مختلف مقاصد کے تحت آنے والے غیر ملکیوں کے لیے داخلے کا عمل سہل بنایا جا سکے۔
سیاحتی ویزا کے تحت غیر ملکی سیاحوں کو کویت کے ثقافتی، تاریخی اور تفریحی مقامات کی سیر کے لیے تین ماہ تک قیام کی اجازت ہوگی۔ اس اقدام سے کویت کے سیاحت کے شعبے کو فروغ دینے میں مدد ملنے کی توقع ہے۔
خاندانی ویزا کے ذریعے کویت میں مقیم افراد اپنے قریبی رشتہ داروں کو 30 دن کے قیام کے لیے مدعو کر سکیں گے۔ اس سہولت سے بیرون ملک مقیم کویتی شہریوں اور غیر ملکی کارکنوں کو اپنے اہلِ خانہ سے ملاقات کا موقع ملے گا۔
تجارتی ویزا کاروباری شخصیات، غیر ملکی کمپنیوں کے نمائندوں اور سرمایہ کاروں کے لیے ہے، جو میٹنگز، معاہدوں یا کاروباری تقریبات میں شرکت کے لیے کویت آنا چاہتے ہیں۔ یہ ویزا بھی 30 دن کے لیے قابلِ استعمال ہوگا۔
سرکاری ویزا صرف سفارتی مشنز اور سرکاری وفود کے لیے مخصوص ہوگا، جو سرکاری سطح کے دوروں اور اجلاسوں کے لیے کویت آئیں گے۔
کویتی حکام کے مطابق ’’وزٹ کویت‘‘ پورٹل کا مقصد بین الاقوامی سطح پر کویت کے تشخص کو جدید، ڈیجیٹل اور مہمان نواز ریاست کے طور پر اجاگر کرنا ہے۔ اس اقدام کے ذریعے ویزا فراہمی کا عمل نہ صرف تیز تر بلکہ شفاف اور خودکار بنایا گیا ہے، جو خطے میں کویت کی ’’ای گورننس‘‘ حکمتِ عملی کا ایک اہم سنگِ میل ہے۔
