اسلام آباد: نیشنل ڈیٹا بیس اینڈ رجسٹریشن اتھارٹی (نادرا) نے پاکستانی شہریوں کے لیے ایک اہم سہولت متعارف کرائی ہے، جس کے تحت اب شناختی کارڈ بنوانے، تجدید کرانے یا اس میں معلومات کی تبدیلی کے لیے دفتر جانے کی ضرورت نہیں رہی۔
نادرا کے مطابق شہری اب گھر بیٹھے شناختی کارڈ حاصل کر سکتے ہیں، صرف چند آسان مراحل میں درخواست جمع کروا کر۔ اس مقصد کے لیے نادرا نے اپنی جدید آن لائن سروس "پاک آئی ڈی ایپ” اور ویب پورٹل کو مکمل طور پر فعال کر دیا ہے، جو شناختی کارڈ کے حصول کا پورا عمل ڈیجیٹل بناتا ہے۔
اس سہولت کے تحت شہری نیا شناختی کارڈ، تجدید شدہ کارڈ یا درستگی کے لیے درخواست دے سکتے ہیں۔ درخواست کے دوران شہریوں کو اپنی ذاتی معلومات، تصاویر اور دستخط فراہم کرنا ہوں گے، جبکہ بائیومیٹرک تصدیق ایپ کے ذریعے ممکن ہوگی۔
نادرا حکام کے مطابق یہ اقدام شہریوں کو دفاتر کی لمبی قطاروں، کاغذی کارروائی اور وقت کے ضیاع سے بچانے کے لیے اٹھایا گیا ہے۔ آن لائن درخواست کے بعد شہری مقررہ فیس کی ادائیگی کر کے اپنا شناختی کارڈ گھر کے پتے پر وصول کر سکیں گے۔
نادرا کا کہنا ہے کہ یہ سہولت نہ صرف پاکستان میں مقیم شہریوں بلکہ بیرونِ ملک پاکستانیوں کے لیے بھی دستیاب ہے تاکہ وہ آسانی سے اپنے قومی شناختی کارڈ کی تجدید یا اجرا کروا سکیں۔
