برازیلیا: وزیراعلیٰ پنجاب مریم نواز شریف عالمی ماحولیاتی کانفرنس COP30 میں شرکت کے لیے برازیل پہنچ گئیں۔ ان کے ہمراہ پنجاب کی سینئر وزیر مریم اورنگزیب، وزیر تعلیم رانا سکندر اور دیگر اعلیٰ حکومتی شخصیات بھی شریک ہیں۔
یہ عالمی کانفرنس ماحولیاتی تبدیلیوں کے اثرات، پائیدار ترقی اور زمین کے تحفظ کے لیے عالمی اقدامات پر مرکوز ہے۔ مریم نواز شریف کانفرنس کے دوران پنجاب میں ماحولیاتی بہتری اور پائیدار ترقی کے اپنے وژن پر خطاب کریں گی۔ ان کے خطاب میں پنجاب کلائمیٹ ریزی لینس پروگرام، ستھرا پنجاب مہم، الیکٹرک وہیکلز کے فروغ، درخت لگانے کی مہمات، اور جنگلات و جنگلی حیات کے تحفظ جیسے منصوبوں پر تفصیل سے بات کی جائے گی۔
مریم نواز نے روانگی سے قبل کہا کہ COP30 عالمی برادری کو ماحولیاتی بحران سے نمٹنے کے لیے عملی اقدامات پر متفق کرنے کا ایک اہم موقع ہے۔ میں چاہتی ہوں کہ پنجاب کے ماحول دوست اقدامات اور وژن کو دنیا کے سامنے اجاگر کیا جائے تاکہ پاکستان کا مثبت کردار نمایاں ہو۔
ذرائع کے مطابق، وزیراعلیٰ پنجاب کانفرنس کے دوران عالمی رہنماؤں، بین الاقوامی ماحولیاتی تنظیموں کے سربراہان اور ماہرین ماحولیات سے ملاقاتیں کریں گی۔ ان ملاقاتوں میں کاربن اخراج میں کمی، صاف توانائی کے فروغ، ماحولیاتی انصاف، اور گرین اکانومی جیسے موضوعات پر تفصیلی تبادلہ خیال کیا جائے گا۔
کانفرنس 21 نومبر تک جاری رہے گی، جس کے دوران دنیا بھر کے 190 سے زائد ممالک کے نمائندے عالمی ماحولیاتی پالیسیوں اور مشترکہ اقدامات پر غور کریں گے۔ ماہرین کے مطابق، مریم نواز کا یہ دورہ پاکستان، بالخصوص پنجاب، کو عالمی ماحولیاتی قیادت کے میدان میں نمایاں کرنے میں مددگار ثابت ہوگا۔
