لاہور: امیر جماعت اسلامی حافظ نعیم الرحمٰن نے کہا ہے کہ پاکستان کا قیام اللہ کی حاکمیت کے اصول پر ہوا اور نظام کو اسی اصل رخ پر لانا ہوگا۔ انہوں نے واضح کیا کہ جماعت اسلامی 27 ویں آئینی ترمیم کو مکمل طور پر مسترد کرتی ہے اور کسی بھی شخص کو عدالتی استثنیٰ غیر شرعی ہے۔
اپنے بیان میں حافظ نعیم الرحمٰن نے کہا کہ پاکستان کو قائم ہوئے 78 سال گزر چکے ہیں لیکن ریاستی نظام وہ سمت اختیار نہیں کرسکا جس کا خواب قائداعظم اور بانیانِ پاکستان نے دیکھا تھا۔ انہوں نے زور دیا کہ قیام پاکستان محض سیاسی جدوجہد نہیں بلکہ عظیم قربانیوں اور تمناؤں کا نتیجہ تھا۔
انہوں نے مزید کہا کہ تحریک پاکستان صرف مسلم اکثریتی علاقوں تک محدود نہیں تھی بلکہ وہ لوگ بھی حصہ بنے جو جانتے تھے کہ انہیں اپنے گھر، زمینیں اور حتیٰ کہ قبریں چھوڑنی پڑیں گی۔ مسلمانوں نے دین کی خاطر بے مثال قربانیاں دیں تاکہ ایک ایسا ملک قائم ہو جہاں اسلام کا عادلانہ نظام نافذ ہو۔
امیر جماعت اسلامی نے کہا کہ پاکستان کا مطلب "لا الہ الا اللہ” کے اصول پر قائم نظام ہے، جہاں اللہ کے سوا کوئی طاقت یا حکومت حاکمیت کا حق نہیں رکھتی۔ انہوں نے کہا کہ اب ضروری ہے کہ نظام کو اس کے اصل نظریاتی اور آئینی رخ کی طرف واپس لایا جائے تاکہ اسلامی عدل اور اجتماعی انصاف کا قیام ممکن ہو۔
