لاہور: وزیراعلیٰ پنجاب مریم نواز شریف نے کہا ہے کہ ترقی اور امن کا راز سائنس اور ٹیکنالوجی میں پنہاں ہے، اور نوجوانوں کو چاہیے کہ وہ سائنسی علوم اور ٹیکنالوجی میں اپنی صلاحیتوں کا بھرپور مظاہرہ کریں۔
امن و خوشحالی کے لیے سائنس کو مرکزی کردار قرار دیتے ہوئے انہوں نے کہا کہ سائنس روزمرہ زندگی میں سہولت، امن اور پائیدار مستقبل کے لیے اہم ہے۔ انہوں نے نوجوان نسل پر زور دیا کہ ریسرچ اور سائنسی پیش رفت سے آگاہ رہیں، اور حکومت پنجاب خاص طور پر طلبہ کو سائنسی ریسرچ کے مواقع فراہم کر رہی ہے۔
مریم نواز نے انفارمیشن ٹیکنالوجی، انجینئرنگ اور دیگر سائنسی شعبوں میں جدت لانے کی اہمیت پر بات کرتے ہوئے کہا کہ نواز شریف آئی ٹی سٹی، نواز شریف کینسر انسٹیٹیوٹ اینڈ ریسرچ سینٹر اور مریم نواز آٹزم سکول اینڈ ریسرچ سینٹر سائنسی تحقیق کو فروغ دینے میں مددگار ہوں گے۔
انہوں نے پنجاب میں پہلی مرتبہ سرکاری سکولوں میں منعقد ہونے والے منفرد سائنس اینڈ ٹیکنالوجی شو کی کامیابی کا ذکر کرتے ہوئے بتایا کہ جشن STEAM میں طلبہ نے جدید ماڈلز پیش کیے، جن میں راجن پور کے ایک طالبعلم نے وائی فائی سے 100 گنا تیز لائی فائی کا ماڈل پیش کر کے سب کو حیران کر دیا۔
وزیراعلیٰ نے کہا کہ پنجاب میں تعلیم، صحت اور زراعت سمیت ہر شعبے کو جدید سائنسی اور ڈیجیٹل خطوط پر ترقی دی جا رہی ہے، اور نوجوانوں کو دعوت دی کہ وہ سائنس اور ٹیکنالوجی میں اپنی مہارتوں کو اجاگر کریں کیونکہ حکومت بھرپور ساتھ دے گی۔ انہوں نے کہا کہ پنجاب اب آئی ٹی اور سلیکون کے انقلابی دور میں داخل ہو رہا ہے۔
