کیڈٹ کالج وانا پر حملہ آور تمام خوارج کو کامیاب آپریشن کے بعد جہنم واصل کر دیا گیا ہے۔
سیکیورٹی ذرائع کے مطابق کالج پر حملہ کرنے والے ایک خودکش حملہ آور سمیت چار خوارج کو پاک فوج کے اہلکاروں نے ہلاک کیا۔ آپریشن کے دوران کالج کے کسی بھی طالب علم یا استاد کو کوئی نقصان نہیں پہنچا۔
ذرائع کا کہنا ہے کہ اس وقت کالج کی عمارت کو بارودی سرنگوں سے مکمل طور پر کلیئر کیا جا رہا ہے تاکہ کسی ممکنہ خطرے کو ختم کیا جا سکے۔ سیکیورٹی فورسز نے نہایت مہارت اور حکمت عملی کے ساتھ کارروائی کرتے ہوئے تمام طلبہ اور اساتذہ کو بحفاظت ریسکیو کر لیا۔
اطلاعات کے مطابق حملے کے وقت 525 کیڈٹس سمیت تقریباً 650 افراد کالج میں موجود تھے۔ افغان خوارج کی موجودگی اور طلبہ کی جانوں کو محفوظ رکھنے کے پیش نظر آپریشن کو انتہائی احتیاط سے مکمل کیا گیا۔
سیکیورٹی ذرائع کے مطابق وانا کیڈٹ کالج پر حملہ کرنے والے خوارجیوں کا تعلق افغانستان سے تھا، اور وہ دوران حملہ ٹیلیفون پر افغانستان سے ہی ہدایات حاصل کر رہے تھے۔ حملہ آور کالج کے مرکزی گیٹ سے بارود سے بھری گاڑی ٹکرا کر اندر داخل ہوئے، جس سے مرکزی دروازہ گر گیا اور قریبی عمارتوں کو بھی نقصان پہنچا۔
ذرائع نے بتایا کہ حملہ آور بعد میں ایک علیحدہ عمارت میں چھپ گئے تھے، جو کیڈٹس کی رہائش سے کافی فاصلے پر تھی۔ پاک فوج اور دیگر سیکیورٹی اداروں نے علاقے کو گھیرے میں لے کر چند گھنٹوں کے اندر آپریشن مکمل کیا، جس کے نتیجے میں تمام خوارج مارے گئے اور کالج کو مکمل طور پر محفوظ قرار دے دیا گیا۔
