کوئٹہ میں بلدیاتی انتخابات کا شیڈول باضابطہ طور پر جاری کر دیا گیا ہے، جس کے تحت شہر بھر کی 172 یونین کونسلز اور 641 وارڈز میں انتخابات منعقد ہوں گے۔ ان انتخابات کا انعقاد دسمبر میں کیا جائے گا اور اس سلسلے میں ابتدائی تیاریاں شروع کر دی گئی ہیں۔
الیکشن کمیشن کی ہدایت پر ریٹرننگ افسران اور ڈسٹرکٹ ریٹرننگ افسران کے دفاتر کے باہر عوامی نوٹس بھی آویزاں کر دیے گئے ہیں تاکہ شہری انتخابی مراحل سے باخبر رہ سکیں۔
شیڈول کے مطابق امیدواروں سے کاغذاتِ نامزدگی کی وصولی اور اجرا 13 سے 17 نومبر تک کی جائے گی۔ بعد ازاں، 18 نومبر کو نامزد امیدواروں کے ناموں کی ابتدائی فہرست شائع کی جائے گی، جب کہ کاغذاتِ نامزدگی کی جانچ پڑتال کا عمل 19 سے 24 نومبر تک جاری رہے گا۔
الیکشن کمیشن کے مطابق، جن امیدواروں کے کاغذات مسترد کیے جائیں گے یا جنہیں اعتراضات درپیش ہوں گے، وہ اپنی اپیلیں 28 نومبر تک جمع کرا سکیں گے۔ ان اپیلوں پر اپیلٹ ٹربیونل کی جانب سے فیصلے کی آخری تاریخ 3 دسمبر مقرر کی گئی ہے۔
امیدواروں کی نظرثانی شدہ فہرست 4 دسمبر کو جاری کی جائے گی، جب کہ دستبرداری کی مدت ختم ہونے کے بعد حتمی نظرثانی شدہ فہرست 5 دسمبر کو شائع کی جائے گی۔
انتخابی عمل کے اگلے مرحلے میں امیدواروں کو انتخابی نشانات 6 دسمبر کو الاٹ کیے جائیں گے۔ بلدیاتی انتخابات کے لیے پولنگ 28 دسمبر بروز اتوار کو منعقد کی جائے گی۔
انتخابات کے دوران سیکیورٹی کے خصوصی انتظامات کیے جائیں گے، اور ضلعی انتظامیہ نے الیکشن کمیشن کو پولنگ اسٹیشنز، عملے کی تعیناتی اور سیکیورٹی پلان کے بارے میں تفصیلی رپورٹ فراہم کرنے کی ہدایت کر دی ہے۔ بلدیاتی انتخابات کے پرامن انعقاد کے لیے قانون نافذ کرنے والے ادارے بھی چوکنا رہیں گے۔
