لاہور: پاکستان کرکٹ بورڈ (پی سی بی) نے اعلان کیا ہے کہ پاکستان سپر لیگ (پی ایس ایل) کی فرنچائز ٹیموں اور دیگر متعلقہ اثاثوں کی ویلیو ایشن کا عمل مکمل ہو گیا ہے۔
پی سی بی نے تمام اہل پی ایس ایل فرنچائزز کو اگلے 10 سال کے لیے نئی فیس کے ساتھ معاہدوں کی تجدید کی پیشکش بھیج دی ہے۔ فرنچائزز سے کہا گیا ہے کہ وہ مقررہ ڈیڈ لائن کے اندر اپنے فیصلے سے پی ایس ایل مینجمنٹ کو آگاہ کریں۔
پی سی بی نے فرنچائز کے 10 سالہ معاہدوں کی شفافیت کو یقینی بنانے کے لیے فرنچائز مالکان اور چارٹرڈ فرم ای وائے مینا (EY MENA) کے درمیان مشترکہ اور انفرادی ملاقاتوں کا انتظام کیا ہے۔ ان ملاقاتوں میں مالکان کو موقع دیا جائے گا کہ وہ ویلیو ایشن کے طریقہ کار کا جائزہ لیں اور کسی بھی قسم کے سوالات پوچھ سکیں۔
مزید برآں، پی سی بی کو ای وائے مینا کی جانب سے دو نئی پی ایس ایل فرنچائز ٹیموں کی ممکنہ قیمتوں کی رپورٹس موصول ہو گئی ہیں، اور دونوں ٹیموں کی فروخت کے لیے ٹینڈر کا عمل جلد شروع کیا جائے گا۔ نئی فرنچائز خریدنے میں دلچسپی رکھنے والوں کو حیدرآباد، سیالکوٹ، مظفرآباد، فیصل آباد، گلگت اور راولپنڈی کے شہروں میں اپنی ٹیم کے لیے انتخاب کرنے کا موقع دیا جائے گا۔
پی سی بی انتظامیہ نے اس عزم کا اظہار کیا کہ وہ پی ایس ایل کے تمام شراکت داروں کے ساتھ منصفانہ، شفاف اور باہمی مفاد پر مبنی تعلقات قائم رکھے گی، کیونکہ یہ لیگ پاکستان کرکٹ کی ترقی اور عالمی سطح پر پہچان میں اہم کردار ادا کر رہی ہے۔
