راولپنڈی: وزیر داخلہ اور پاکستان کرکٹ بورڈ (پی سی بی) کے چیئرمین محسن نقوی نے پنڈی کرکٹ اسٹیڈیم کا دورہ کیا، جہاں انہوں نے پاکستان اور سری لنکا کی کرکٹ ٹیموں کی پریکٹس دیکھی اور کھلاڑیوں سے ملاقات بھی کی۔
محسن نقوی کے ہمراہ سری لنکا کے ہائی کمشنر فریڈ سری ویراتنے اور وزیر مملکت طلال چوہدری بھی موجود تھے۔ اس موقع پر وزیر داخلہ نے سکیورٹی انتظامات کا جائزہ لیا اور ڈیوٹی پر تعینات اہلکاروں سے ملاقات کی۔
چیئرمین پی سی بی نے قانون نافذ کرنے والے اداروں کے جوانوں کو ہدایت کی کہ وہ اپنی جانفشانی سے فرائض انجام دیں۔ انہوں نے سری لنکن کھلاڑیوں سے بھی ملاقات کی اور دورہ جاری رکھنے پر مہمان کھلاڑیوں کا شکریہ ادا کیا۔ محسن نقوی نے سری لنکن ٹیم سے کہا کہ ان کی سکیورٹی پاکستان کی ذمہ داری ہے، اور ان کا دورہ پاکستان امن کی فتح اور دہشت گردی کی شکست کی علامت ہے۔ انہوں نے کہا کہ پورا پاکستان سری لنکن ٹیم کی محبت اور خلوص کا مقروض ہے۔
سری لنکن ہائی کمشنر نے اس موقع پر کہا کہ انہوں نے مختلف ممالک میں خدمات انجام دی ہیں، لیکن وہ پاکستان کو اپنا دوسرا گھر سمجھتے ہیں۔
واضح رہے کہ پاکستان اور سری لنکا کی ٹیموں نے میچ کی تیاری کے لیے بھرپور پریکٹس کی، اور دونوں ٹیموں کے درمیان دوسرا ون ڈے کل کھیلا جائے گا۔
