قومی کرکٹر بابراعظم نے کہا ہے کہ گزشتہ دو سالوں میں بہتر پرفارم نہ کرنے کے باوجود وہ تنقید کا جواب دینے سے گریز کرتے رہے اور اپنی توجہ صرف گراؤنڈ میں پرفارم کرنے پر مرکوز رکھی۔
سری لنکا کے خلاف دوسرے ون ڈے میں شاندار کامیابی کے بعد پریس کانفرنس کرتے ہوئے بابر اعظم نے کہا کہ مشکل وقت گزرا، تاہم انہوں نے اپنی فٹنس، بیٹنگ اور فیلڈنگ پر کام جاری رکھا۔ انہوں نے کہا کہ جب بھی مشکلات آئیں، اپنے اوپر اعتماد رکھیں اور محنت جاری رکھیں۔
بابر اعظم نے مداحوں کا شکریہ ادا کرتے ہوئے کہا کہ برے وقت میں مداحوں کی حمایت نے انہیں بہت حوصلہ دیا۔ انہوں نے مزید کہا کہ سنچری اسکور کرنے کے بعد ان کا اعتماد بحال ہوا اور وہ پہلے سے زیادہ خود پر بھروسہ محسوس کر رہے ہیں۔
پاکستان نے تین میچز پر مشتمل ون ڈے سیریز کے دوسرے میچ میں سری لنکا کو 8 وکٹوں سے شکست دی۔ اس میچ میں سنچری اسکور کرکے بابر اعظم نے قومی ریکارڈ برابر کیا، جس میں سعید انور نے پاکستان کے لیے 244 اننگز میں 20 ون ڈے انٹرنیشنل سنچریاں اسکور کی تھیں۔ بابر اعظم نے اپنی 136 ویں اننگز میں 20 ویں ون ڈے سنچری مکمل کی، اور کم سے کم اننگز میں 20 سنچریاں مکمل کرنے والے تیسرے کھلاڑی بن گئے۔
