اقوامِ متحدہ میں پاکستان کے مستقل مندوب عاصم افتخار نے غزہ میں تنازع کے خاتمے کے لیے صدر ٹرمپ کے غزہ منصوبے کا خیرمقدم کیا۔
سلامتی کونسل سے خطاب کرتے ہوئے عاصم افتخار نے کہا کہ وہ اس منصوبے کی حمایت کرتے ہیں کیونکہ اس کے ذریعے غزہ میں جنگ کے خاتمے کی امید پیدا ہوئی ہے۔ انہوں نے واضح کیا کہ پاکستان کا بنیادی مقصد غزہ میں معصوم فلسطینیوں کے قتل عام کی روک تھام اور غزہ سے اسرائیلی فورسز کا مکمل انخلا ہے۔ انہوں نے کہا کہ مذاکرات میں پاکستان نے عرب ممالک کے پروپوزل کی حمایت کی اور اپنی تجاویز بھی شامل کیں۔
عاصم افتخار نے مزید کہا کہ پاکستان کی موقف کے مطابق 1967 سے پہلے کی سرحدوں کے مطابق فلسطینی ریاست قائم ہونی چاہیے اور اس کا دارالحکومت القدس ہونا چاہیے۔ یاد رہے کہ اقوامِ متحدہ کی سلامتی کونسل میں امریکی صدر ڈونلڈ ٹرمپ کے غزہ منصوبے کی حمایت میں قرارداد منظور کر لی گئی، جس کے حق میں 14 ووٹ آئے اور مخالفت میں کوئی ووٹ نہیں دیا گیا، جبکہ روس اور چین نے ووٹنگ میں حصہ نہیں لیا۔ امریکی مندوب نے پاکستان، مصر، قطر، اردن، سعودی عرب، متحدہ عرب امارات، ترکی اور انڈونیشیا کا شکریہ ادا کیا۔
