جاپان میں ریچھوں کو آبادی سے دور رکھنے کے لیے بھونکنے والے ڈرون تعینات کر دیے گئے ہیں۔
غیر ملکی خبر رساں ادارے کے مطابق، گزشتہ ہفتے جاپان کے شہر ہدا میں یہ ڈرون استعمال کرنا شروع کیے گئے تاکہ ریچھوں کو آبادی والے علاقوں سے دور رکھا جا سکے۔ میڈیا رپورٹس میں بتایا گیا ہے کہ ہدا کے ڈرون اسپیکر سے لیس ہیں، جو شکاری کتوں کی آوازیں بجا کر ریچھوں کو ڈراتے ہیں۔
اس کے علاوہ، ریچھوں کو پہاڑوں کی گہرائی میں بھگانے کے لیے آتش بازی کا بھی استعمال کیا گیا۔ واضح رہے کہ رواں سال اپریل سے اب تک جاپان میں ریچھوں کے حملوں میں 220 افراد زخمی ہو چکے ہیں، اور ریچھ مختلف باغات کے پھلوں کو بھی شدید نقصان پہنچا چکے ہیں۔ یہ اقدامات ریچھوں کی بڑھتی ہوئی آبادی اور شہری علاقوں میں ان کے خطرناک ہونے کے پیشِ نظر کیے جا رہے ہیں۔
