امریکی صدر ڈونلڈ ٹرمپ نے سعودی عرب کو اہم نان نیٹو اتحادی قرار دیتے ہوئے دونوں ممالک کے اسٹریٹیجک تعلقات کو نئی مضبوطی دی، جبکہ ولی عہد محمد بن سلمان کے اعزاز میں دیے گئے خصوصی عشائیے میں مستقبل کے دفاعی اور اقتصادی تعاون کے بڑے فیصلے سامنے آئے۔
وائٹ ہاؤس میں ہونے والی اس تقریب میں ایلون مسک اور کرسٹیانو رونالڈو سمیت عالمی شخصیات نے شرکت کی۔ تقریب کے دوران ٹرمپ نے کہا کہ سعودی ولی عہد کا وائٹ ہاؤس میں خیرمقدم کرتے ہوئے انہیں خوشی ہے اور امریکا سعودی عرب کے ساتھ اپنے تاریخی اور مضبوط تعلقات کو مزید آگے بڑھانا چاہتا ہے۔ انہوں نے اعلان کیا کہ دونوں ممالک کے درمیان اسٹریٹیجک دفاعی معاہدے پر دستخط ہو چکے ہیں جو خطے کے امن کے لیے نہایت اہم ہے۔
اپنے خطاب میں صدر ٹرمپ نے دعویٰ کیا کہ مشرق وسطیٰ میں دیرپا امن کے قیام کے قریب ہیں اور موجودہ صورتحال میں غزہ پہلے کے مقابلے میں زیادہ محفوظ ہو چکا ہے۔ انہوں نے بتایا کہ ’غزہ بورڈ آف پیس‘ کے اجلاس میں مختلف ممالک کے سربراہان شریک ہوں گے۔ اس کے علاوہ ٹرمپ نے کہا کہ حماس کی جانب سے مزید یرغمالیوں کی لاشیں اسرائیلی خاندانوں کے حوالے کر دی گئی ہیں۔
تقریب کے اختتام پر سعودی ولی عہد محمد بن سلمان نے بہترین مہمان نوازی پر امریکی صدر کا شکریہ ادا کیا اور کہا کہ سعودی عرب کے امریکا کے ساتھ تعلقات ہمیشہ مضبوط رہے ہیں اور مستقبل میں یہ تعاون مزید بڑھے گا۔ انہوں نے کہا کہ ہم امریکا کے ساتھ مشترکہ مفادات کے تحفظ اور عالمی امن کے لیے مل کر کام جاری رکھیں گے۔
بعد ازاں وائٹ ہاؤس کی جانب سے جاری اعلامیے میں بتایا گیا کہ امریکا اور سعودی عرب کے درمیان سول نیوکلیئر معاہدے پر اتفاق ہوگیا ہے۔ اعلامیے کے مطابق صدر ٹرمپ نے سعودی عرب کے لیے بڑے دفاعی پیکج کی بھی منظوری دے دی ہے، جس کے تحت سعودی عرب امریکا سے جدید ایف 35 لڑاکا طیارے اور تقریباً 300 ٹینکس خریدے گا۔ یہ دفاعی معاہدے دونوں ممالک کے اسٹریٹیجک تعاون میں ایک بڑا اور تاریخی اضافہ ہیں۔
