سندھ حکومت نے اعلان کیا ہے کہ کراچی میں آئندہ ہفتے سے ڈبل ڈیکر بسیں اور نئی ای وی بسیں چلائی جائیں گی۔ سندھ کے دیگر اضلاع میں بھی پیپلز بس سروس کے نئے روٹس جلد شروع کیے جائیں گے۔
سینیئر وزیر شرجیل انعام میمن کی زیر صدارت محکمہ ٹرانسپورٹ کا اجلاس ہوا، جس میں یلو لائن اور ریڈ لائن بی آر ٹی کے ترقیاتی کام، کراچی میں ای وی ٹیکسی سروس کی شروعات، اور پنک اسکوٹیز اسکیم کے دوسرے مرحلے پر بریفنگ دی گئی۔
شرجیل میمن کا کہنا تھا کہ ڈبل ڈیکر اور ای وی بسیں جلد کراچی پہنچ جائیں گی، جبکہ دسمبر تک ای وی ٹیکسی سروس شروع کرنے اور مالی سال میں مزید 500 بسیں شامل کرنے کا منصوبہ ہے۔ انہوں نے سندھ کے دیگر اضلاع میں پیپلز بس سروس کے نئے روٹس کے لیے آپریشنل تیاریاں مکمل کرنے کی بھی ہدایت کی۔
