وزیراعلیٰ سندھ مراد علی شاہ کا سندھ کے بارے میں بھارتی وزیر دفاع کے بیان پر سخت ردعمل سامنے آیا ہے۔ سوشل میڈیا پر بھارتی وزیر دفاع کو جواب دیتے ہوئے وزیراعلیٰ سندھ نے کہا کہ بھارتی وزیر دفاع تاریخ سے ناواقف ہیں اور سندھ پر ان کا بیان سفارتی طور پر غیرذمہ دارانہ ہے۔
وزیراعلیٰ سندھ نے مزید کہا کہ بھارتی وزیر دفاع اپنی داخلی تقسیم پر توجہ دیں اور ہمارے متعلق دن میں خواب دیکھنا چھوڑ دیں۔ ان کا کہنا تھا کہ سندھ نے قیام پاکستان سے بھی پہلے، یعنی 1936 میں بمبئی پریذیڈنسی سے علیحدگی اختیار کی تھی اور سندھ کے عوام نے اپنی خودمختاری، وقار اور سیاسی شناخت کو ہمیشہ ترجیح دی ہے۔
مراد علی شاہ نے واضح کیا کہ سندھ پاکستان کا اٹوٹ انگ اور ناقابلِ تقسیم حصہ ہے۔ ان کا کہنا تھا کہ سندھ کل بھی پاکستان کا حصہ تھا، آج بھی ہے اور ہمیشہ پاکستان کا حصہ رہے گا۔
