الیکشن کمیشن نے وزیراعلیٰ خیبرپختونخوا سہیل آفریدی کو انتخابی ضابطہ اخلاق کی خلاف ورزی کے کیس میں آج ذاتی حیثیت میں طلب کر لیا۔
الیکشن کمیشن نے وزیراعلیٰ سہیل آفریدی کے خلاف ضابطہ اخلاق کی خلاف ورزی کے کیس میں عبوری حکم نامہ بھی جاری کر دیا۔ حکم نامے میں کہا گیا ہے کہ وزیراعلیٰ خیبرپختونخوا کو ذاتی حیثیت میں پیش ہونے کے لیے نوٹس جاری کیا گیا تھا۔ وزیر اعلیٰ کی جانب سے علی بخاری پیش ہوئے اور ذاتی حیثیت میں استثنا کی درخواست دی۔
حکم نامے کے مطابق الیکشن کمیشن نے سہیل آفریدی کی پیشی سے استثنا کی درخواست ایک دن کے لیے منظور کی، جبکہ اگلی سماعت آج دن 12 بجے ہوگی۔
دوسری جانب پشاور ہائی کورٹ میں وزیراعلیٰ سہیل آفریدی کی الیکشن کمیشن کی طلبی کے نوٹس کے خلاف درخواست سماعت کے لیے منظور کر لی گئی ہے۔ پشاور ہائی کورٹ میں سہیل آفریدی کی درخواست پر سماعت آج ہوگی۔
وزیراعلیٰ نے درخواست میں مؤقف اپنایا کہ الیکشن کمیشن کا وزیراعلیٰ کے پی کو طلب کرنا غیرقانونی ہے، الیکشن کمیشن کی جانب سے طلبی کا نوٹس غیر قانونی قرار دیا جائے اور الیکشن کمیشن کو وزیراعلیٰ کے خلاف کسی بھی قسم کی کارروائی سے روکا جائے۔
