پاکستان نے بنگلادیش کو ایک لاکھ ٹن چاول برآمد کرنے کے لیے تیاریاں شروع کر دی ہیں۔
ٹریڈنگ کارپوریشن آف پاکستان نے ایک لاکھ میٹرک ٹن چاول کی خریداری کے لیے باضابطہ طور پر ٹینڈر جاری کر دیا ہے۔ ٹی سی پی کے مطابق چاول کراچی پورٹ کے ذریعے بنگلادیش برآمد کیا جائے گا، جبکہ بولیاں جمع کرانے کی آخری تاریخ 28 نومبر مقرر کی گئی ہے۔ بولی کے لیے کم از کم 25 ہزار ٹن اور زیادہ سے زیادہ ایک لاکھ ٹن کی حد مقرر کی گئی ہے۔
کنٹریکٹ ایوارڈ ہونے کے 45 روز کے اندر ترسیل کو لازمی قرار دیا گیا ہے۔ پاکستان نے حال ہی میں بنگلادیش کو خطے کے ممالک بشمول چین اور وسطی ایشیائی ریاستوں کے ساتھ تجارت کے لیے کراچی پورٹ بطور گیٹ وے استعمال کرنے کی پیشکش بھی کی ہے۔
رواں مالی سال کی پہلی سہ ماہی میں پاکستان کی چاول برآمدات میں 28 فیصد کمی ریکارڈ کی گئی تھی۔ تاہم امریکا کی جانب سے بھارتی چاول سمیت مختلف مصنوعات پر 50 فیصد ٹیرف عائد کیے جانے کے بعد پاکستان کے لیے امریکی مارکیٹ میں نئی تجارتی گنجائش بھی پیدا ہوئی ہے۔