اقوام متحدہ میں پاکستان کے مستقل مندوب عاصم افتخار نے دوٹوک الفاظ میں واضح کیا کہ پاکستان فلسطینی عوام کے حق خودارادیت اور آزاد فلسطینی ریاست کے قیام کے لیے مکمل حمایت جاری رکھے گا۔
پاکستانی مندوب عاصم افتخار نے سلامتی کونسل کو غزہ میں اسرائیلی فوج کی جانب سے کی جانے والی جنگ بندی معاہدے کی خلاف ورزیوں سے آگاہ کیا۔ انہوں نے بتایا کہ غزہ میں اسرائیل کی جنگ بندی کی خلاف ورزیاں جاری ہیں اور جنگ بندی کے اعلان کے بعد سے 300 سے زائد فلسطینی شہید ہو چکے ہیں۔ غزہ میں اب بھی گھر تباہ کیے جا رہے ہیں اور عوام خوف و ہراس میں زندگی گزار رہے ہیں۔
عاصم افتخار نے کہا کہ اسرائیلی فوج کے ہاتھوں مزید 4 فلسطینی شہید ہوئے ہیں اور اس کے بعد امدادی تنظیموں نے غزہ میں اپنے آپریشن روکنے کا اعلان کیا ہے۔
پاکستانی مندوب نے غزہ میں حملوں کی شدید الفاظ میں مذمت کرتے ہوئے اسرائیلی فوج کے انخلا پر زور دیا۔ ساتھ ہی انہوں نے واضح کیا کہ غزہ میں جنگ بندی کی مکمل پابندی اور فوری امن قائم کرنے کے لیے سلامتی کونسل کی قرارداد 2803 پر مکمل عمل درآمد ضروری ہے۔
عاصم افتخار نے سلامتی کونسل پر زور دیا کہ غزہ میں فوری اقدامات کیے جائیں اور جنگ بندی پر مکمل عمل درآمد یقینی بنایا جائے۔ انہوں نے انسانی امداد کی بلا روک ٹوک فراہمی کی ضرورت پر بھی زور دیا اور کہا کہ موسم سرما کے پیش نظر غزہ کے شدید مصائب کا شکار عوام کو فوری تحفظ اور وسیع پیمانے پر امداد فراہم کی جائے۔
پاکستانی مندوب نے غزہ کی تعمیر و بحالی کے فوری آغاز پر بھی زور دیا اور کہا کہ کسی بھی قسم کا الحاق یا جبری بے دخلی ہر صورت میں نہیں ہونی چاہیے۔ انہوں نے واضح کیا کہ پاکستان آزاد ریاست کے قیام کی جدوجہد میں فلسطین کے ساتھ کھڑا ہے۔
عاصم افتخار نے کہا کہ تمام عرب علاقوں سے اسرائیلی قبضے کا خاتمہ ہونا چاہیے اور ایسی فلسطینی ریاست قائم کی جائے جس کا دارالحکومت القدس شریف ہو۔
