اسلام آباد: ڈسٹرکٹ اینڈ سیشن کورٹ نے 9 مئی سمیت دیگر مقدمات میں عمران خان اور بشریٰ بی بی کی ضمانت میں توسیع کر دی۔
اسلام آباد کے ایڈیشنل ڈسٹرکٹ اینڈ سیشن جج محمد افضل مجوکہ نے بانی پی ٹی آئی کے خلاف 9 مئی اور دیگر پانچ کیسز کی سماعت کی۔ دوران سماعت عمران خان کی عدم دستیابی کے باعث ضمانت کی درخواستوں پر دلائل نہیں ہو سکے اور عدالت نے اگلی سماعت میں بانی پی ٹی آئی کو عدالت میں یا بذریعہ ویڈیو لنک پیش کرنے کی ہدایت کی۔
لاہور ہائی کورٹ نے 9 مئی کا ایک ہی مقدمہ چلانے کی عمران خان کی درخواست بھی بحال کر دی ہے۔
عدالت نے سماعت کے بعد عمران خان اور بشریٰ بی بی کی ضمانت قبل از گرفتاری میں توسیع کرتے ہوئے دونوں کو 23 دسمبر تک گرفتار کرنے سے روک دیا۔ بعد ازاں عدالت نے ضمانت کی درخواستوں پر سماعت بھی 23 دسمبر تک ملتوی کر دی۔
واضح رہے کہ عمران خان کے خلاف 9 مئی، اقدام قتل، جعلی رسیدوں سمیت دیگر مقدمات درج ہیں، جب کہ بشریٰ بی بی کے خلاف مبینہ جعلی رسیدیں جمع کروانے پر مقدمہ درج ہے۔
