ادیس ابابا: ایتھوپیا میں پھٹنے والے آتش فشاں کی راکھ کے بادل بھارتی شہروں تک پہنچ گئے، جب کہ پاکستان کی فضائی حدود اب کلیئر ہو چکی ہیں۔
ایتھوپیا میں 12 ہزار سال بعد پھٹے آتش فشاں سے فضاء میں پھیلنے والی راکھ کے اثرات پاکستان کے بعد اب بھارت کے کئی شہروں تک بھی پہنچ گئے ہیں۔
بھارتی محکمہ موسمیات کے مطابق راکھ کے اثرات گجرات، نئی دہلی، راجستھان، پنجاب اور ہریانہ تک دیکھے گئے، اور فلائٹ آپریشنز کے دوران راستوں میں تبدیلیاں کی جا رہی ہیں۔ بھارتی میڈیا کے مطابق ائیر انڈیا نے احتیاطی تدابیر کے طور پر ان طیاروں کی پروازیں منسوخ کر دی ہیں جو آتش فشاں کے زیرِ اثر فضائی راستوں سے گزر رہے تھے۔
بھارتی محکمہ موسمیات کے مطابق راکھ کے بادل چین کی جانب بڑھ رہے ہیں اور منگل کی شام ساڑھے 7 بجے تک بھارت سے نکل جائیں گے۔
اس معاملے پر جیو نیوز سے گفتگو کرتے ہوئے ترجمان محکمہ موسمیات پاکستان انجم نذیر نے بتایا کہ آتش فشاں کی راکھ اب بھارت کی جانب بڑھ چکی ہے اور پاکستان کی فضائی حدود صاف ہو چکی ہیں۔ انہوں نے کہا کہ راکھ بھارتی راجستھان کی جانب جائے گی اور پاکستان کے شمالی علاقوں کو متاثر نہیں کرے گی۔ یہ راکھ سندھ کے اوپر بحیرہ عرب سے گزری تھی اور سندھ کی زمین پر اس کے کوئی اثرات نہیں ہوئے۔
ترجمان نے مزید کہا کہ پاکستان کی تاریخ میں پہلی مرتبہ ایوی ایشن کو آتش فشاں کی راکھ کے حوالے سے ایڈوائزری جاری کی گئی۔ آتش فشاں کی راکھ کی بلندی 45 ہزار فٹ سے زائد تھی، جبکہ پاکستان میں ڈومیسٹک فلائٹ آپریشن 36 ہزار فٹ اور بین الاقوامی فلائٹ آپریشن 40 ہزار سے 48 ہزار فٹ کی بلندی پر ہوتا ہے۔
