لاہور سمیت پنجاب کے کئی شہروں میں شدید فضائی آلودگی کا سلسلہ برقرار ہے، جس کے باعث شہریوں کی صحت اور روزمرہ سرگرمیوں پر منفی اثرات پڑ رہے ہیں۔
ماحولیاتی ویب سائٹ کے مطابق آلودہ ترین شہروں کی فہرست میں صوبائی دارالحکومت لاہور پہلے نمبر پر ہے، جہاں مجموعی ائیر کوالٹی انڈیکس 331 ریکارڈ کیا گیا، جو انسانی صحت کے لیے نہایت خطرناک سطح ہے۔
کراچی کی فضا بھی مضر صحت قرار دی گئی ہے، جہاں ائیر کوالٹی انڈیکس 225 ریکارڈ کیا گیا۔ اسی طرح پنجاب کے دیگر شہروں کی صورتحال بھی تشویشناک ہے۔ قصور میں ایئر کوالٹی انڈیکس 327، نارووال میں 313 جبکہ شیخوپورہ میں پارٹیکولیٹ میٹرز کی مقدار 292 ریکارڈ کی گئی۔
عالمی ماحولیاتی ویب سائٹ کے مطابق فضائی آلودگی کے لحاظ سے دنیا کے بڑے شہروں کی فہرست میں لاہور کا چھٹا جبکہ کراچی کا چودھواں نمبر ہے، جو خطے میں بڑھتی ہوئی ماحولیاتی آلودگی کی سنگین صورتحال کی نشاندہی کرتا ہے۔
ادھر شدید دھند کے باعث موٹروے ایم ون کو پشاور ٹول پلازہ سے برہان تک ٹریفک کے لیے بند کر دیا گیا ہے، تاکہ حادثات سے بچا جاسکے اور شہریوں کی حفاظت کو یقینی بنایا جائے۔
