اسلام آباد: فیڈرل بورڈ آف ریونیو (ایف بی آر) نے ٹیکس نیٹ بڑھانے کے لیے پروفیشنلز کے آڈٹ کا فیصلہ کیا ہے۔ ذرائع کے مطابق مختلف شعبوں کے آڈٹ کے لیے پہلے مرحلے میں 600 نجی آڈیٹرز کی خدمات حاصل کر لی گئی ہیں اور آنے والے چند روز میں مزید 200 نجی آڈیٹرز شامل کیے جائیں گے۔ مجموعی طور پر ایف بی آر 2 ہزار نجی آڈیٹرز کی خدمات حاصل کرے گا، جو ٹیکس دہندگان کی معلومات خفیہ رکھنے کے پابند ہوں گے۔
ذرائع کا کہنا ہے کہ بھاری فیس لینے والے ڈاکٹرز کو ٹیکس نیٹ میں لایا جائے گا اور بڑے شہروں کراچی، لاہور اور اسلام آباد میں ان کے نوٹس کا اجراء شروع ہو چکا ہے۔ پہلے مرحلے میں تینوں شہروں میں 250 مہنگے ڈاکٹرز کی آمدن کا آڈٹ کیا جائے گا، جس میں کراچی اور لاہور میں 100، 100 جبکہ اسلام آباد میں 50 ڈاکٹرز شامل ہیں۔
ایف بی آر ذرائع کے مطابق بڑے شہروں میں مہنگے بیوٹی پارلرز اور مہنگی کاسمیٹکس فروخت کرنے والوں کو بھی ٹیکس نیٹ میں شامل کیا جائے گا۔ اس کے علاوہ پینٹ سیکٹر میں بھی ٹیکس چوری کے خلاف کارروائیاں کی جائیں گی اور نجی کمپنیاں بھی اس میں زیرِ نظر آئیں گی۔
