متحدہ عرب امارات: متحدہ عرب امارات نے عوامی تحفظ کو مدنظر رکھتے ہوئے ملک میں غیر قانونی طور پر مقیم افراد کو رہائش یا ملازمت فراہم کرنے والے افراد کے لیے سخت سزاؤں اور بھاری جرمانوں کا اعلان کر دیا ہے۔ گلف نیوز کے مطابق اب ایسے اقدامات کرنے والے افراد کے خلاف قانونی کارروائی نہایت سخت ہوگی تاکہ سماجی استحکام اور شہریوں کی حفاظت یقینی بنائی جا سکے۔
رپورٹ میں بتایا گیا ہے کہ غیر قانونی طور پر مقیم تارکین وطن کو ملازمت یا رہائش فراہم کرنے والے افراد عوامی سلامتی کے لیے خطرہ بن سکتے ہیں اور غیر قانونی سرگرمیوں میں ملوث ہو سکتے ہیں۔ اس لیے حکومت نے اس ضمن میں سخت قوانین نافذ کرنے کا فیصلہ کیا ہے تاکہ ملک میں امن و امان برقرار رہے اور شہریوں کی حفاظت یقینی بنائی جا سکے۔
متحدہ عرب امارات میں غیر قانونی رہائش یا ملازمت دینے کے خلاف قوانین 2021 سے نافذ ہیں، جن کے تحت مجرمین کے لیے ایک لاکھ درہم سے 5 ملین درہم تک جرمانے، اور کم از کم 2 ماہ کی قید مقرر ہے۔ گلف نیوز کے مطابق یہ قوانین غیر قانونی سرگرمیوں کو روکنے اور عوامی تحفظ کو یقینی بنانے کے لیے نافذ کیے گئے ہیں۔
رپورٹ میں یہ بھی بتایا گیا ہے کہ وزٹ یا سیاحتی ویزا رکھنے والے افراد کا یو اے ای میں ملازمت کرنا سنگین خلاف ورزی کے زمرے میں آتا ہے، اور ایسے افراد کو 10 ہزار درہم جرمانے کا سامنا کرنا پڑ سکتا ہے۔ اس کے علاوہ جعلی رہائشی دستاویزات استعمال کرنے والے افراد کے لیے 10 سال قید کی سزا بھی متعین کی گئی ہے تاکہ غیر قانونی سرگرمیوں کو ختم کیا جا سکے۔
